jo mahrum hai tere lutf-o-karam se wo be-par nahin hai to phir aur kya hai

jo mahrūm hai tere lutf-o-karam se vo be-par nahīñ hai to phir aur kyā hai

jise mil ga.ī tere dar kī gadā.ī sikandar nahīñ hai to phir aur kyā hai

har ik gaam apne vo hairat-fazā hai junūñ meñ ik aisā maqām aa gayā hai

na apnī ḳhabar hai na un kā pata hai ye mahshar nahīñ hai to phir aur kyā hai

tasavvur meñ tere jo khoyā huā hai terī mastiyoñ meñ jo Duubā huā hai

qasam haq kī bande se maulā huā hai qalandar nahīñ hai to phir aur kyā hai

mohabbat 'ajab kuchh mazā de rahī hai mohabbat pata yaar kā de rahī hai

mohabbat ḳhudā se milā de rahī hai ye rahbar nahīñ hai to phir aur kyā hai

mohabbat se maḳhmūr hai zarra-zarra mohabbat mohabbat hī hai zāt-e-yaktā

mohabbat ke dariyā kā har ik qatra samandar nahīñ hai to phir aur kiyā hai

tujhe dekh kar ham jiye jā rahe haiñ ki sajdoñ pe sajde kiye jā rahe haiñ

farishte bhī jis jā jhuke jā rahe haiñ terā dar nahīñ hai to phir aur kyā hai

hai chashm-e-basīrat se jis ne bhī dekhā 'amīr'-e-hazīñ be-dhaḌak bol uTThā

ye dair-o-haram ye mere dil kī duniyā terā ghar nahīñ hai to phir aur kyā hai

jo mahrum hai tere lutf-o-karam se wo be-par nahin hai to phir aur kya hai

jise mil gai tere dar ki gadai sikandar nahin hai to phir aur kya hai

har ek gam apne wo hairat-faza hai junun mein ek aisa maqam aa gaya hai

na apni KHabar hai na un ka pata hai ye mahshar nahin hai to phir aur kya hai

tasawwur mein tere jo khoya hua hai teri mastiyon mein jo Duba hua hai

qasam haq ki bande se maula hua hai qalandar nahin hai to phir aur kya hai

mohabbat 'ajab kuchh maza de rahi hai mohabbat pata yar ka de rahi hai

mohabbat KHuda se mila de rahi hai ye rahbar nahin hai to phir aur kya hai

mohabbat se maKHmur hai zarra-zarra mohabbat mohabbat hi hai zat-e-yakta

mohabbat ke dariya ka har ek qatra samandar nahin hai to phir aur kiya hai

tujhe dekh kar hum jiye ja rahe hain ki sajdon pe sajde kiye ja rahe hain

farishte bhi jis ja jhuke ja rahe hain tera dar nahin hai to phir aur kya hai

hai chashm-e-basirat se jis ne bhi dekha 'amir'-e-hazin be-dhaDak bol uTTha

ye dair-o-haram ye mere dil ki duniya tera ghar nahin hai to phir aur kya hai