jitna kami ki nama-syahi mein rah gai

jitnā kamī ki nāma-syāhī meñ rah ga.ī

utnī hī der ’afv-e-ilāhī meñ rah ga.ī

hasrat nahīñ vatan kī tabāhī meñ rah ga.ī

kuchh gard thī ki dāman-e-rāhī meñ rah ga.ī

sad shukr 'afv mere gunah hashr meñ hue

hurmat gadā kī majlis-e-shāhī meñ rah ga.ī

aañkh us ne pher lī to kahāñ phir hamārī ziist

aadhī to jaan nīm-nigāhī meñ rah ga.ī

thī zaar kū-e-yār meñ kyā jaatī hālat ḳhaak

itnī thī kam ki uḌ ke havā hī meñ rah ga.ī

dī bhī to qadd-e-yār ko tuubā se dī misāl

pastī mirī buland nigāhī meñ rah ga.ī

dekho ta’alliyāñ mirī qindīl-e-āh kī

kaisī laTak ke 'arsh-e-ilāhī meñ rah ga.ī

Duube hue nasīb na uchhle kisī tarah

kashtī ubhar ubhar ke tabāhī meñ rah ga.ī

baḳht-e-siyah se āñkheñ na us se huiiñ do chaar

chau-mak chamak chamak ke siyāhī meñ rah ga.ī

parde se us kī zaat ko kyā kaam thā 'amīr'

chhup kar sifāt-e-nā-mutanāhī meñ rah ga.ī

jitna kami ki nama-syahi mein rah gai

utni hi der ’afw-e-ilahi mein rah gai

hasrat nahin watan ki tabahi mein rah gai

kuchh gard thi ki daman-e-rahi mein rah gai

sad shukr 'afw mere gunah hashr mein hue

hurmat gada ki majlis-e-shahi mein rah gai

aankh us ne pher li to kahan phir hamari zist

aadhi to jaan nim-nigahi mein rah gai

thi zar ku-e-yar mein kya jati haalat KHak

itni thi kam ki uD ke hawa hi mein rah gai

di bhi to qadd-e-yar ko tuba se di misal

pasti meri buland nigahi mein rah gai

dekho ta’alliyan meri qindil-e-ah ki

kaisi laTak ke 'arsh-e-ilahi mein rah gai

Dube hue nasib na uchhle kisi tarah

kashti ubhar ubhar ke tabahi mein rah gai

baKHt-e-siyah se aankhen na us se huin do chaar

chau-mak chamak chamak ke siyahi mein rah gai

parde se us ki zat ko kya kaam tha 'amir'

chhup kar sifat-e-na-mutanahi mein rah gai