kuchh Thikana hai na-tawani ka

kuchh Thikānā hai nā-tavānī kā

na uThā bojh zindagānī kā

daaġh dil meñ jo hai javānī kā

gul hai ye sham.a zindagānī kā

jāntā huuñ ki ḳhud-numā ho tum

parda kab tak ye lan-tarānī kā

aur ai pīr-e-charḳh kyā kosūñ

sabr tujh par mirī javānī kā

raah meñ vo mujhe mile to huā

sāmnā marg-e-nā-gahānī kā

halqa-e-chashm vaqt-e-naz.a nahīñ

hai ye chhallā tirī nishānī kā

josh-e-fasl-e-bahār meñ ai gul

rañg hai terī nau-javānī kā

naaz un ke bhī uTh nahīñ sakte

zor hai ab ye nā-tavānī kā

is taraf bhī nigāh-e-lutf kabhī

sadqa ai nau-javān javānī kā

marg jis ko jahāñ meñ kahte haiñ

naam hai merī zindagānī kā

misl-e-shabnam hamārī qismat meñ

ek daana hai vo bhī paanī kā

ruḳh tirā kis tarah maiñ dekh sakūñ

zulf hai laam lan-tarānī kā

chakkar aayā mujhe to ye samjhā

us ne chhallā diyā nishānī kā

chaudhvīñ kā bhī chāñd sadqe thā

haa.e a.alam tirī javānī kā

na uThā muflisī meñ dast-e-savāl

hai ye ehsān nā-tavānī kā

puurā puurā shabīh-e-yūsuf meñ

rañg hai terī nau-javānī kā

kyuuñ na piirī meñ dāġh-e-dil ho aziiz

phuul hai bāġh-e-nau-javānī kā

dil butoñ se uThā nahīñ saktā

shukr karatā huuñ nā-tavānī kā

muntazir hashr meñ hai dāman-e-tar

mahr-e-mahshar kī mehrbānī kā

rah gayā hai firāq meñ mujh ko

aasrā marg-e-nā-gahānī kā

dil to maiñ nazr kar chukā ai jaan

ab sabab kyā hai mehrbānī kā

ziist kā e'tibār kyā hai 'amīr'

aadmī bulbulā hai paanī kā

kuchh Thikana hai na-tawani ka

na uTha bojh zindagani ka

dagh dil mein jo hai jawani ka

gul hai ye shama zindagani ka

jaanta hun ki KHud-numa ho tum

parda kab tak ye lan-tarani ka

aur ai pir-e-charKH kya kosun

sabr tujh par meri jawani ka

rah mein wo mujhe mile to hua

samna marg-e-na-gahani ka

halqa-e-chashm waqt-e-naza nahin

hai ye chhalla teri nishani ka

josh-e-fasl-e-bahaar mein ai gul

rang hai teri nau-jawani ka

naz un ke bhi uTh nahin sakte

zor hai ab ye na-tawani ka

is taraf bhi nigah-e-lutf kabhi

sadqa ai nau-jawan jawani ka

marg jis ko jahan mein kahte hain

nam hai meri zindagani ka

misl-e-shabnam hamari qismat mein

ek dana hai wo bhi pani ka

ruKH tera kis tarah main dekh sakun

zulf hai lam lan-tarani ka

chakkar aaya mujhe to ye samjha

us ne chhalla diya nishani ka

chaudhwin ka bhi chand sadqe tha

hae aalam teri jawani ka

na uTha muflisi mein dast-e-sawal

hai ye ehsan na-tawani ka

pura pura shabih-e-yusuf mein

rang hai teri nau-jawani ka

kyun na piri mein dagh-e-dil ho aziz

phul hai bagh-e-nau-jawani ka

dil buton se uTha nahin sakta

shukr karata hun na-tawani ka

muntazir hashr mein hai daman-e-tar

mahr-e-mahshar ki mehrbani ka

rah gaya hai firaq mein mujh ko

aasra marg-e-na-gahani ka

dil to main nazr kar chuka ai jaan

ab sabab kya hai mehrbani ka

zist ka e'tibar kya hai 'amir'

aadmi bulbula hai pani ka