dil mein KHayal un aankhon ka laya na jaega

dil meñ ḳhayāl un āñkhoñ kā laayā na jā.egā

mai-ḳhāna ghar ḳhudā kā banāyā na jā.egā

aahoñ se soz-e-ishq miTāyā na jā.egā

āñdhī se ye charāġh bujhāyā na jā.egā

ye tiira shām-e-ġham hai ki kahtā hai saaya bhī

ab mujh se paas aap ke aayā na jā.egā

gar haiñ yahī jafā.eñ to zālim jazā ke din

aaḌe mirī vafā se bhī aayā na jā.egā

kyuuñ yaas toḌtī hai mere dil kā aasrā

ye ghar ujaḌ gayā to basāyā na jā.egā

vahshat meñ thak ke mujh se ye ham-zād ne kahā

mujh se to saath aap ke aayā na jā.egā

chullū hī se pilā de mujhe sāqiyā sharāb

huuñ nā-tavān jaam uThāyā na jā.egā

dikhlā ke sab ko dast-e-hinā.ī vo kahte haiñ

āshiq kā ye lahū hai chhupāyā na jā.egā

ro.ungā dard-e-dil se kabhī maiñ jo baaġh meñ

phūloñ ko phir sabā se hañsāyā na jā.egā

dozaḳh ne mujh ko dekh ke mālik se ye kahā

mujh se to ye ġharīb jalāyā na jā.egā

sau ġham-gusār laakh hoñ ġham-ḳhvār ās-pās

dil meñ jo dard hai vo baTāyā na jā.egā

mujh rū-siyah ko qabr meñ rahne de ai karīm

ye muñh kisī ko mujh se dikhāyā na jā.egā

tere hazār ġhamze maiñ qātil uThā.ūñgā

ḳhanjar kā tere naaz uThāyā na jā.egā

dīdār-e-yār kā na uThegā maza 'amīr'

jab tak duī kā parda uThāyā na jā.egā

dil mein KHayal un aankhon ka laya na jaega

mai-KHana ghar KHuda ka banaya na jaega

aahon se soz-e-ishq miTaya na jaega

aandhi se ye charagh bujhaya na jaega

ye tera sham-e-gham hai ki kahta hai saya bhi

ab mujh se pas aap ke aaya na jaega

gar hain yahi jafaen to zalim jaza ke din

aaDe meri wafa se bhi aaya na jaega

kyun yas toDti hai mere dil ka aasra

ye ghar ujaD gaya to basaya na jaega

wahshat mein thak ke mujh se ye ham-zad ne kaha

mujh se to sath aap ke aaya na jaega

chullu hi se pila de mujhe saqiya sharab

hun na-tawan jam uThaya na jaega

dikhla ke sab ko dast-e-hinai wo kahte hain

aashiq ka ye lahu hai chhupaya na jaega

rounga dard-e-dil se kabhi main jo bagh mein

phulon ko phir saba se hansaya na jaega

dozaKH ne mujh ko dekh ke malik se ye kaha

mujh se to ye gharib jalaya na jaega

sau gham-gusar lakh hon gham-KHwar aas-pas

dil mein jo dard hai wo baTaya na jaega

mujh ru-siyah ko qabr mein rahne de ai karim

ye munh kisi ko mujh se dikhaya na jaega

tere hazar ghamze main qatil uThaunga

KHanjar ka tere naz uThaya na jaega

didar-e-yar ka na uThega maza 'amir'

jab tak dui ka parda uThaya na jaega