main kabhi waqt pe maqtal se na Tal jaunga

maiñ kabhī vaqt pe maqtal se na Tal jā.ūñgā

kuchh zamāna nahīñ karvaT jo badal jā.ūñgā

laakh duniyā meñ phañsūñ chaal vo chal jā.ūñgā

ki maiñ is bhūl-bhulayyāñ se nikal jā.ūñgā

ḳhabar aa.ī ki vo aatā hai 'iyādat ke liye

ab kuchh ummīd paḌī hai ki sambhal jā.ūñgā

sochtā hai mirī tap dekh ke furqat meñ tabīb

nabz ko haath lagā.ūñgā to jal jā.ūñgā

huuñ subuk-rūh karegā mujhe kyā qaid koī

misl-e-āvāz salāsil se nikal jā.ūñgā

mastī un āñkhoñ meñ aatī hai to kahtā hai hijāb

dekh tū aa.ī to maiñ ghar se nikal jā.ūñgā

bāġh-e-a.alam meñ huuñ goyā shajr-e-ātish-bāz

aur bhī phūlūñ phalūñgā jo maiñ jal jā.ūñgā

sāmne se jo vo sarkeñge to hogī ye taḌap

aks-e-ā.īna-sifat ghar se nikal jā.ūñgā

dekhne de mujhe ruḳhsār tirā harj hai kyā

do ghaḌī dekh ke phūloñ ko bahal jā.ūñgā

mar ke bhī dil se miTegā na hasīnoñ kā ḳhayāl

saath lekar maiñ yahī husn-e-amal jā.ūñgā

josh-e-vahshat meñ mujhe qaidi-e-zindāñ na kaaro

sail huuñ toḌ ke dīvār nikal jā.ūñgā

ātish-e-ishq mujhe ho ga.ī gulzār-e-ḳhalīl

dil meñ samjhā thā vo kāfir ki maiñ jal jā.ūñgā

qadr-dāñ 'mus.hafī'-o-hazrat-e-'saudā' the 'amīr'

le ke turbat pe unhīñ kī ye ġhazal jā.ūñgā

main kabhi waqt pe maqtal se na Tal jaunga

kuchh zamana nahin karwaT jo badal jaunga

lakh duniya mein phansun chaal wo chal jaunga

ki main is bhul-bhulayyan se nikal jaunga

KHabar aai ki wo aata hai 'iyaadat ke liye

ab kuchh ummid paDi hai ki sambhal jaunga

sochta hai meri tap dekh ke furqat mein tabib

nabz ko hath lagaunga to jal jaunga

hun subuk-ruh karega mujhe kya qaid koi

misl-e-awaz salasil se nikal jaunga

masti un aankhon mein aati hai to kahta hai hijab

dekh tu aai to main ghar se nikal jaunga

bagh-e-alam mein hun goya shajr-e-atish-baz

aur bhi phulun phalunga jo main jal jaunga

samne se jo wo sarkenge to hogi ye taDap

aks-e-aina-sifat ghar se nikal jaunga

dekhne de mujhe ruKHsar tera harj hai kya

do ghaDi dekh ke phulon ko bahal jaunga

mar ke bhi dil se miTega na hasinon ka KHayal

sath lekar main yahi husn-e-amal jaunga

josh-e-wahshat mein mujhe qaidi-e-zindan na karo

sail hun toD ke diwar nikal jaunga

aatish-e-ishq mujhe ho gai gulzar-e-KHalil

dil mein samjha tha wo kafir ki main jal jaunga

qadr-dan 'mushafi'-o-hazrat-e-'sauda' the 'amir'

le ke turbat pe unhin ki ye ghazal jaunga