har jam mein hai jalwa-e-mastana kisi ka

har jaam meñ hai jalva-e-mastāna kisī kā

mai-ḳhāna hamārā hai jilau-ḳhāna kisī kā

jis aañkh ko dekhā hai jilau-ḳhāna kisī kā

jis dil pe nazar kī vo hai kāshāna kisī kā

jab dekhte haiñ abr-e-siyah kahte haiñ ham mast

jaatā hai ye uḌtā huā mai-ḳhāna kisī kā

bū zulf kī laa.ī jo sabā maiñ ne ye jaanā

dil lene ko aayā hai ye bai.āna kisī kā

badlī hai ki mai-ḳhāna hai bijlī hai ki mai hai

ye ra.ad hai yā na.ara-e-mastāna kisī kā

le chal mujhe us qātil-e-a.alam kī galī meñ

kuchh kaam kar ai himmat-e-mardāna kisī kā

saaqī na dikhā bahr-e-ḳhudā sāġhar-e-ḳhālī

labrez huā jaatā hai paimāna kisī kā

ye husn ke bāzār meñ kyā TuuT paḌī hai

sau dete haiñ phirtā nahīñ bai.āna kisī kā

ai tāle'-e-bedār maiñ sotā huuñ ḳhabar-dār

pahlū se mere ho na judā shāna kisī kā

kyā tum se kahūñ dil kī ḳharābī kā maiñ ahvāl

barbād ho allāh ghar aisā na kisī kā

farhād pe kyā guzrī jo mujh par nahīñ guzrī

maiñ apne sivā kyuuñ kahūñ afsāna kisī kā

kuchh aur baḌhā detī hai us husn kī mastī

ye aarsī chhoTā sā hai paimāna kisī kā

āvāz-e-parī suur kī āvāz ko samjhā

mahshar meñ hai mast au bhī dīvāna kisī kā

nādān samajhte haiñ ki baḌ maar rahā hai

kyā jāniye kis dhun meñ hai dīvāna kisī kā

mastoñ meñ kisī ke dil-e-badmast ko DhūñDo

hogā unhīñ dīvānoñ meñ dīvāna kisī kā

hotī hai jagah ganj kī vīrāna hamesha

jo dil hai shikasta vo hai kāshāna kisī kā

niklā hai kisī sham.a-e-jahāñ soz kī dhun meñ

ḳhurshīd-e-qayāmat bhī hai parvāna kisī kā

kyūñkar na suneñ shauq se gul kaan lagā kar

murġhān-e-chaman kahte haiñ afsāna kisī kā

vo husn hai allāh kī qudrat kā tamāshā

rañg aur butoñ se hai judāgāna kisī kā

be-kār 'amīr' apne dil-o-dīda nahīñ haiñ

ā.īna kisī kā hai ye vo shāna kisī kā

har jam mein hai jalwa-e-mastana kisi ka

mai-KHana hamara hai jilau-KHana kisi ka

jis aankh ko dekha hai jilau-KHana kisi ka

jis dil pe nazar ki wo hai kashana kisi ka

jab dekhte hain abr-e-siyah kahte hain hum mast

jata hai ye uDta hua mai-KHana kisi ka

bu zulf ki lai jo saba main ne ye jaana

dil lene ko aaya hai ye baiana kisi ka

badli hai ki mai-KHana hai bijli hai ki mai hai

ye rad hai ya nara-e-mastana kisi ka

le chal mujhe us qatil-e-alam ki gali mein

kuchh kaam kar ai himmat-e-mardana kisi ka

saqi na dikha bahr-e-KHuda saghar-e-KHali

labrez hua jata hai paimana kisi ka

ye husn ke bazar mein kya TuT paDi hai

sau dete hain phirta nahin baiana kisi ka

ai tale'-e-bedar main sota hun KHabar-dar

pahlu se mere ho na juda shana kisi ka

kya tum se kahun dil ki KHarabi ka main ahwal

barbaad ho allah ghar aisa na kisi ka

farhad pe kya guzri jo mujh par nahin guzri

main apne siwa kyun kahun afsana kisi ka

kuchh aur baDha deti hai us husn ki masti

ye aarsi chhoTa sa hai paimana kisi ka

aawaz-e-pari sur ki aawaz ko samjha

mahshar mein hai mast au bhi diwana kisi ka

nadan samajhte hain ki baD mar raha hai

kya jaaniye kis dhun mein hai diwana kisi ka

maston mein kisi ke dil-e-badmast ko DhunDo

hoga unhin diwanon mein diwana kisi ka

hoti hai jagah ganj ki virana hamesha

jo dil hai shikasta wo hai kashana kisi ka

nikla hai kisi shama-e-jahan soz ki dhun mein

KHurshid-e-qayamat bhi hai parwana kisi ka

kyunkar na sunen shauq se gul kan laga kar

murghan-e-chaman kahte hain afsana kisi ka

wo husn hai allah ki qudrat ka tamasha

rang aur buton se hai judagana kisi ka

be-kar 'amir' apne dil-o-dida nahin hain

aaina kisi ka hai ye wo shana kisi ka