shauq KHalwat mein bhi hai anjuman-arai ka

shauq ḳhalvat meñ bhī hai anjuman-ārā.ī kā

ā.īna-ḳhāna hai gosha mirī tanhā.ī kā

paañv par tere jo sar hai tire shaidā.ī kā

bosa maqsūd hai parda hai jabīñ-sā.ī kā

paañv sahrā meñ Tikā kab tire saudā.ī kā

dil meñ laale ke rahā daaġh hī tanhā.ī kā

ḳhaak par ḳhuun jo Tapkā tire saudā.ī kā

daaġh uchhal kar vo huā lāla-e-sahrā.ī kā

ham tire husn ke bāzār se phir jaa.eñ kahāñ

tuur Thekā ho jo muusā se tamāshā.ī kā

be-sabātī-e-chaman hairat-e-nargis se khulī

mil gayā kaur se surma hameñ bīnā.ī kā

shafaq-e-shām nahīñ hai ye mere mātam meñ

muñh ko aayā hai kalejā shab-e-tanhā.ī kā

lā-makāñ par talab ahmad ko ḳhudā ne bhī kiyā

mutahammil ho bashar kyā ġham tanhā.ī kā

rū-safedī mujhe hāsil hai siyah-kārī meñ

maiñ bhī kyā ḳhat-e-amal huuñ kisī saudā.ī kā

shauq-e-dīdār meñ uThtī hai jo har vaqt nigāh

nā-tavāñ maiñ unheñ shub.ha hai tavānā.ī kā

dil-e-kuffār usī se kiye allāh ne ḳhalq

bach rahā kuchh jo añdherā shab-e-tanhā.ī kā

us ruḳh-e-sāf ko dekhūñ to baḌhī aur faroġh

surma ho gard-e-nazar aañkh kī bīnā.ī kā

Taal jaate haiñ mujhe dekh ke vo ḳhalq kahāñ

rañg hai muflis-o-mun.im kī shanāsā.ī kā

dast-e-gustāḳh se kar dāman-e-yūsuf ko na chaak

ai zuleḳhā hai ye kūcha tirī rusvā.ī kā

koī aatā nahīñ mujh tak jo ba-juz yād-e-ḳhudā

lā-makāñ gosha hai shāyad mirī tanhā.ī kā

teġh-e-mizhgāñ kā ġhazab haath lagāyā tum ne

kaT gayā haa.e nigah chashm-e-tamāshā.ī kā

ain sajde meñ muyassar hai nazāra us kā

chashm-e-bīnā hai ki daaġh apne jabīñ-sā.ī kā

sohbat-e-mardum-e-behis meñ bahaltā nahīñ dil

laakh tasvīreñ hoñ par rañj hai tanhā.ī kā

shauq se teġh lagāo mujhe lekin hai ye Dar

kHañda-e-zakHm DañDhorā na ho rusvā.ī kā

piyās us kī jo bujhegī to mai-e-kausar se

zarf aa.alī hai 'amīr' ahmad-e-mīnā.ī kā

shauq KHalwat mein bhi hai anjuman-arai ka

aaina-KHana hai gosha meri tanhai ka

panw par tere jo sar hai tere shaidai ka

bosa maqsud hai parda hai jabin-sai ka

panw sahra mein Tika kab tere saudai ka

dil mein lale ke raha dagh hi tanhai ka

KHak par KHun jo Tapka tere saudai ka

dagh uchhal kar wo hua lala-e-sahrai ka

hum tere husn ke bazar se phir jaen kahan

tur Theka ho jo musa se tamashai ka

be-sabaati-e-chaman hairat-e-nargis se khuli

mil gaya kaur se surma hamein binai ka

shafaq-e-sham nahin hai ye mere matam mein

munh ko aaya hai kaleja shab-e-tanhai ka

la-makan par talab ahmad ko KHuda ne bhi kiya

mutahammil ho bashar kya gham tanhai ka

ru-safedi mujhe hasil hai siyah-kari mein

main bhi kya KHat-e-amal hun kisi saudai ka

shauq-e-didar mein uThti hai jo har waqt nigah

na-tawan main unhen shubha hai tawanai ka

dil-e-kuffar usi se kiye allah ne KHalq

bach raha kuchh jo andhera shab-e-tanhai ka

us ruKH-e-saf ko dekhun to baDhi aur farogh

surma ho gard-e-nazar aankh ki binai ka

Tal jate hain mujhe dekh ke wo KHalq kahan

rang hai muflis-o-munim ki shanasai ka

dast-e-gustaKH se kar daman-e-yusuf ko na chaak

ai zuleKHa hai ye kucha teri ruswai ka

koi aata nahin mujh tak jo ba-juz yaad-e-KHuda

la-makan gosha hai shayad meri tanhai ka

tegh-e-mizhgan ka ghazab hath lagaya tum ne

kaT gaya hae nigah chashm-e-tamashai ka

ain sajde mein muyassar hai nazara us ka

chashm-e-bina hai ki dagh apne jabin-sai ka

sohbat-e-mardum-e-behis mein bahalta nahin dil

lakh taswiren hon par ranj hai tanhai ka

shauq se tegh lagao mujhe lekin hai ye Dar

kHanda-e-zakHm DanDhora na ho ruswai ka

piyas us ki jo bujhegi to mai-e-kausar se

zarf aaali hai 'amir' ahmad-e-minai ka