dagh dega tujhe ye shauq KHud-arai ka

daaġh degā tujhe ye shauq ḳhud-ārā.ī kā

dekh ā.īna hai dushman tirī yaktā.ī kā

jis ne dekhā hai tujhe dekhtī haiñ sab us ko

ḳhalq hai jam.a tamāshā hai tamāshā.ī kā

ā.īna dekh ke aa.e haiñ maze meñ aise

ḳhud vo muñh chūmte haiñ apne tamāshā.ī kā

rāstī qulzum-e-ulfat meñ rahī ham ko pasand

jab kahā qasd kiyā sher kī pīrā.ī kā

jaur phūloñ ke uThā jī na churā ai bulbul

ghar meñ sayyād ke hai mahkama gīrā.ī kā

tū bhī aa.e to na vo aañkh uThā kar dekhe

aur hī rañg hai ab tere tamāshā.ī kā

chīñḳh uThā lauT gayā tū ne uThā dī jo naqāb

aaj jī chhūT gayā tere tamāshā.ī kā

ai ajal jald ḳhabar le ki Darātā hai mujhe

dev ban ban ke añdherā shab-e-tanhā.ī kā

dil mirā siine meñ kyā ab to do-a.alam meñ nahīñ

chal diyā ban ke ḳhayāl us but-e-harjā.ī kā

tujh ko jalva-gah-e-nāz meñ rokā thāmā

hausla dekh liyā apne tamāshā.ī kā

phirtī hai hasrat-e-pā-bos do-a.alam meñ tabāh

ik jagah paañv Thahartā nahīñ harjā.ī kā

apne jalve ko vo ḳhud dekh ke kah uThte haiñ

vaah kyā aañkh hai kyā dil hai tamāshā.ī kā

dasht meñ laala hai gulzār meñ gul bazm meñ sham.a

har jagah rañg nayā hai mere harjā.ī kā

dauḌ kar barq-e-tajallī ne sambhālā us ko

laḌkhaḌāyā jo qadam tere tamāshā.ī kā

sar shab-o-roz jo vahshat se hai chakkar meñ 'amīr'

ye bhī shāyad hai qadam us but-e-harjā.ī kā

dagh dega tujhe ye shauq KHud-arai ka

dekh aaina hai dushman teri yaktai ka

jis ne dekha hai tujhe dekhti hain sab us ko

KHalq hai jama tamasha hai tamashai ka

aaina dekh ke aae hain maze mein aise

KHud wo munh chumte hain apne tamashai ka

rasti qulzum-e-ulfat mein rahi hum ko pasand

jab kaha qasd kiya sher ki pirai ka

jaur phulon ke uTha ji na chura ai bulbul

ghar mein sayyaad ke hai mahkama girai ka

tu bhi aae to na wo aankh uTha kar dekhe

aur hi rang hai ab tere tamashai ka

chinKH uTha lauT gaya tu ne uTha di jo naqab

aaj ji chhuT gaya tere tamashai ka

ai ajal jald KHabar le ki Daraata hai mujhe

dew ban ban ke andhera shab-e-tanhai ka

dil mera sine mein kya ab to do-alam mein nahin

chal diya ban ke KHayal us but-e-harjai ka

tujh ko jalwa-gah-e-naz mein roka thama

hausla dekh liya apne tamashai ka

phirti hai hasrat-e-pa-bos do-alam mein tabah

ek jagah panw Thaharta nahin harjai ka

apne jalwe ko wo KHud dekh ke kah uThte hain

wah kya aankh hai kya dil hai tamashai ka

dasht mein lala hai gulzar mein gul bazm mein shama

har jagah rang naya hai mere harjai ka

dauD kar barq-e-tajalli ne sambhaala us ko

laDkhaDaya jo qadam tere tamashai ka

sar shab-o-roz jo wahshat se hai chakkar mein 'amir'

ye bhi shayad hai qadam us but-e-harjai ka