gor mein tumne jo lashe ko utara hota

gor meñ tum ne jo lāshe ko utārā hotā

ai buto ḳhātima bil-ḳhair hamārā hotā

ruḳh-e-jānāñ kā muyassar jo nazārā hotā

mahr-e-tābāñ mirī qismat kā sitārā hotā

dekhte chehre ko apne agar ā.īne meñ

haal jo kuchh hai hamārā vo tumhārā hotā

dil ko us zulf kā lāzim thā tasavvur itnā

ki dhuāñ aah kā bhī ambar-e-sārā hotā

ham vo mai-kash haiñ ki hai apnī nigāhoñ meñ asar

sar ke bal dauḌte shīshe jo ishārā hotā

vā'da-e-qatl meñ manzūr thā aisā jo ḳhilāf

haath par haath na jallād ne maarā hotā

chāhī fir.aun ne muusā se madad chuuk gayā

ġharq hotā na agar tum ko pukārā hotā

kyā nigah bhī nahīñ uTh saktī thī ḳhanjar kī tarah

taak kar tum ne koī tiir hī maarā hotā

naza.a ke vaqt chhupā.ī thiiñ na tum ko palkeñ

Dūbte vaqt to tinke kā sahārā hotā

ḳhat mirā le ke kabūtar jo pahuñchā us tak

nasr-e-tā.ir mire tāle.a kā sitārā hotā

ġhair ke saath pilāte to na piitā maiñ sharāb

nañg kyūñkar ye mire dil ko gavārā hotā

bar-ḳhilāf aisī havā bāġh-e-jahāñ kī hai 'amīr'

phuul ko haath lagātā to sharārā hotā

gor mein tum ne jo lashe ko utara hota

ai buto KHatima bil-KHair hamara hota

ruKH-e-jaanan ka muyassar jo nazara hota

mahr-e-taban meri qismat ka sitara hota

dekhte chehre ko apne agar aaine mein

haal jo kuchh hai hamara wo tumhaara hota

dil ko us zulf ka lazim tha tasawwur itna

ki dhuan aah ka bhi ambar-e-sara hota

hum wo mai-kash hain ki hai apni nigahon mein asar

sar ke bal dauDte shishe jo ishaara hota

wa'da-e-qatl mein manzur tha aisa jo KHilaf

hath par hath na jallad ne mara hota

chahi firaun ne musa se madad chuk gaya

gharq hota na agar tum ko pukara hota

kya nigah bhi nahin uTh sakti thi KHanjar ki tarah

tak kar tum ne koi tir hi mara hota

naza ke waqt chhupai thin na tum ko palken

Dubte waqt to tinke ka sahaara hota

KHat mera le ke kabutar jo pahuncha us tak

nasr-e-tair mere talea ka sitara hota

ghair ke sath pilate to na pita main sharab

nang kyunkar ye mere dil ko gawara hota

bar-KHilaf aisi hawa bagh-e-jahan ki hai 'amir'

phul ko hath lagata to sharara hota