nahin mumkin rasai la-makan tak

nahīñ mumkin rasā.ī lā-makāñ tak

nishāñ kis tarah pahuñche be-nishāñ tak

tirī saffākiyāñ pahuñchīñ yahāñ tak

ki Dartī hai hayāt-e-jāvidāñ tak

karūñ zabt-e-nafas hamdam kahāñ tak

lagī hai aag ik dil se zabāñ tak

pahuñch jaa.e agar mujh saḳht-jāñ tak

to māñge maut marg-e-nā-gahāñ tak

maiñ huuñ vo nā-tavāñ jab aah khīñchī

to Thahrī sau jagah dil se zabāñ tak

kaḌī hai is qadar manzil adam kī

ki mar mar kar pahuñchte haiñ vahāñ tak

bahār āḳhir hai aur maiñ be-par-o-bāl

qafas se Daak baiThe āshiyāñ tak

maiñ huuñ is anjuman meñ sham-e-tasvīr

ki soz-e-dil nahīñ aatā zabāñ tak

hazāroñ hasratoñ kā ho gayā ḳhuuñ

kahāñ tak pās-e-rusvā.ī kahāñ tak

mirī vāmāñdgī kahtī hai mujh se

pahuñchnā ho chukā ab kārvāñ tak

ġhash aayā zāhid-o-masjid meñ be-mai

chalo lekar mujhe pīr-e-muġhāñ tak

tire qurbān ai betābī-e-dil

mujhe pahuñchā de us ke āstāñ tak

makān-e-yār tak qāsid na pahuñchā

ga.e kaise payambar lā-makāñ tak

bahut hī zor par hai vasl kā shauq

nazākat aaḌe aa.egī kahāñ tak

maiñ vo dil-soḳhta huuñ is chaman meñ

jale bijlī jo aa.e āshiyāñ tak

nahīñ kuchh teġh-e-qātil hī kashīda

ḳhafā hai mujh se marg-e-nā-gahāñ tak

na paa.ī gard nāloñ ne asar kī

zamīñ se ḳhaak chhānī āsmāñ tak

jo yuuñ aane na de us kī galī meñ

to pahuñchūñ ḳhvāb ban kar pāsbāñ tak

taḌapne se mere tañg aake bole

tasallī de koī tujh ko kahāñ tak

kahāñ ham ai 'amīr' ab aur kahāñ 'dāġh'

ye jalse ho chuke ḳhuld-āshiyāñ tak

nahin mumkin rasai la-makan tak

nishan kis tarah pahunche be-nishan tak

teri saffakiyan pahunchin yahan tak

ki Darti hai hayat-e-jawidan tak

karun zabt-e-nafas hamdam kahan tak

lagi hai aag ek dil se zaban tak

pahunch jae agar mujh saKHt-jaan tak

to mange maut marg-e-na-gahan tak

main hun wo na-tawan jab aah khinchi

to Thahri sau jagah dil se zaban tak

kaDi hai is qadar manzil adam ki

ki mar mar kar pahunchte hain wahan tak

bahaar aaKHir hai aur main be-par-o-baal

qafas se Dak baiThe aashiyan tak

main hun is anjuman mein sham-e-taswir

ki soz-e-dil nahin aata zaban tak

hazaron hasraton ka ho gaya KHun

kahan tak pas-e-ruswai kahan tak

meri wamandgi kahti hai mujh se

pahunchna ho chuka ab karwan tak

ghash aaya zahid-o-masjid mein be-mai

chalo lekar mujhe pir-e-mughan tak

tere qurban ai betabi-e-dil

mujhe pahuncha de us ke aastan tak

makan-e-yar tak qasid na pahuncha

gae kaise payambar la-makan tak

bahut hi zor par hai wasl ka shauq

nazakat aaDe aaegi kahan tak

main wo dil-soKHta hun is chaman mein

jale bijli jo aae aashiyan tak

nahin kuchh tegh-e-qatil hi kashida

KHafa hai mujh se marg-e-na-gahan tak

na pai gard nalon ne asar ki

zamin se KHak chhani aasman tak

jo yun aane na de us ki gali mein

to pahunchun KHwab ban kar pasban tak

taDapne se mere tang aake bole

tasalli de koi tujh ko kahan tak

kahan hum ai 'amir' ab aur kahan 'dagh'

ye jalse ho chuke KHuld-ashiyan tak