wah kya KHub par-o-baal nikale bulbul

vaah kyā ḳhuub par-o-bāl nikāle bulbul

uḌte hī paḌ ga.ī sayyād ke paale bulbul

bāġhbān rahm se vāqif nahīñ gulchīñ bedard

ek ham haiñ tire pahchānñe vaale bulbul

yahī ronā hai to phūloñ kā ḳhudā hāfiz hai

āñsuoñ se tire sab bhar ga.e thāle bulbul

na jalā tujh se qafas maiñ ne chaman phūñk diyā

dekh haiñ garm tire yā mere naale bulbul

phuul gulshan meñ na aa.e the ki sayyād aayā

dil ke armān kaho kyā ḳhaak nikāle bulbul

zab.h sayyād karegā tujhe kal hai ye ḳhabar

aaj jo kuchh ho sunānā vo sunā le bulbul

hañs rahā hai abhī sayyād nahīñ vāqif hai

chuTkiyāñ leñge jigar meñ tire naale bulbul

bāġhbāñ kā jo shab-o-roz jalānā hai yahī

āshiyāñ barq ko kar degī havāle bulbul

haath gulchīñ ke kiye baaġh meñ kāñToñ ne figār

ḳhuub hī phūTe tire dil ke bhī chhāle bulbul

phuul phūle hue baiThe haiñ chaman meñ tujh se

chahchahe karke zarā un ko manā le bulbul

tujh se hañste haiñ kabhī karte haiñ gulchīñ se mazāq

un guloñ ke haiñ kuchh andāz nirāle bulbul

dam ulaT jaa.e na sayyād kā sunte sunte

dard-añgez na kar aise tu naale bulbul

ik din aa.egī ḳhizāñ donoñ kī kaise ye 'amīr'

chaar din baaġh meñ be-par kī uḌā le bulbul

wah kya KHub par-o-baal nikale bulbul

uDte hi paD gai sayyaad ke pale bulbul

baghban rahm se waqif nahin gulchin bedard

ek hum hain tere pahchanne wale bulbul

yahi rona hai to phulon ka KHuda hafiz hai

aansuon se tere sab bhar gae thaale bulbul

na jala tujh se qafas main ne chaman phunk diya

dekh hain garm tere ya mere nale bulbul

phul gulshan mein na aae the ki sayyaad aaya

dil ke arman kaho kya KHak nikale bulbul

zabh sayyaad karega tujhe kal hai ye KHabar

aaj jo kuchh ho sunana wo suna le bulbul

hans raha hai abhi sayyaad nahin waqif hai

chuTkiyan lenge jigar mein tere nale bulbul

baghban ka jo shab-o-roz jalana hai yahi

aashiyan barq ko kar degi hawale bulbul

hath gulchin ke kiye bagh mein kanTon ne figar

KHub hi phuTe tere dil ke bhi chhaale bulbul

phul phule hue baiThe hain chaman mein tujh se

chahchahe karke zara un ko mana le bulbul

tujh se hanste hain kabhi karte hain gulchin se mazaq

un gulon ke hain kuchh andaz nirale bulbul

dam ulaT jae na sayyaad ka sunte sunte

dard-angez na kar aise tu nale bulbul

ek din aaegi KHizan donon ki kaise ye 'amir'

chaar din bagh mein be-par ki uDa le bulbul