jata to uske kuche mein hai bar bar dil

jaatā to us ke kūche meñ hai baar baar dil

khaa.e na choT yaas kī umīd-vār dil

dikhlā rahā hai sair mirā dāġh-dār dil

paayā ḳhizāñ se maiñ nai bāġh-o-bahār dil

is gul-badan ke ishq meñ hai dāġh-dār dil

kyā shoḳh rañg phūloñ kā pahne hai haar dil

tirchhī nazar nishāne pe paḌtī nahīñ kabhī

ai turk is adā se na hogā shikār dil

garm-e-ḳhirām-e-nāz ho tum ye to dekh lo

kis kā paḌā huā hai sar-e-rahguzār dil

bazm-e-visāl hai ki koī said-gāh hai

merā shikār tum ho tumhārā shikār dil

jis dam nikal chalā mere pahlū ko toḌ kar

royā lipaT ke tiir se be-iḳhtiyār dil

ThanDī haiñ us ke aage hasīnoñ kī garmiyāñ

putlā hai shoḳhiyoñ kā mirā be-qarār dil

kaam aa.egā zarūr kisī din huzūr ke

pahlū meñ apne rakhte haiñ ham honhār dil

bijlī jo koh-e-tūr par chamkī thī ek din

āshiq ke siine meñ hai isī kā sharār dil

ghar se nikal ke dekh to leñ ik nazar huzūr

laa.e haiñ peshkash ke liye jāñ-nisār dil

muusā ko barq-e-tūr kā jalva dikhā diyā

pahuñchā taḌap ke daur mirā be-qarār dil

dekhī vo chashm-e-mast to āñkheñ sī khul ga.iiñ

jab hosh uḌ ga.e to huā hoshiyār dil

īfā-e-ahd-e-vasl na īfā-e-ahd-e-qatl

kis baat kā tumhārī kare e'tibār dil

ushshāq kī kamī nahīñ ma.ashūq chāhiye

ho dil kā qadr-dān to sattar hazār dil

taskīn de tasavvur-e-jānāñ kise kise

be-tāb idhar hai jaan udhar be-qarār dil

aayā ḳhayāl kushta-e-sīmāb dekh kar

ye ḳhaak ho gayā hai koī be-qarār dil

aate haiñ fātihe ke liye roz dard-o-ġham

hai ārzū-e-murda kā goyā mazār dil

ḳhaak ārzū-e-vasl karūñ ab tak ai 'amīr'

ye bhī ḳhabar nahīñ kise karatā hai pyaar dil

jata to us ke kuche mein hai bar bar dil

khae na choT yas ki umid-war dil

dikhla raha hai sair mera dagh-dar dil

paya KHizan se main nai bagh-o-bahaar dil

is gul-badan ke ishq mein hai dagh-dar dil

kya shoKH rang phulon ka pahne hai haar dil

tirchhi nazar nishane pe paDti nahin kabhi

ai turk is ada se na hoga shikar dil

garm-e-KHiram-e-naz ho tum ye to dekh lo

kis ka paDa hua hai sar-e-rahguzar dil

bazm-e-visal hai ki koi said-gah hai

mera shikar tum ho tumhaara shikar dil

jis dam nikal chala mere pahlu ko toD kar

roya lipaT ke tir se be-iKHtiyar dil

ThanDi hain us ke aage hasinon ki garmiyan

putla hai shoKHiyon ka mera be-qarar dil

kaam aaega zarur kisi din huzur ke

pahlu mein apne rakhte hain hum honhaar dil

bijli jo koh-e-tur par chamki thi ek din

aashiq ke sine mein hai isi ka sharar dil

ghar se nikal ke dekh to len ek nazar huzur

lae hain peshkash ke liye jaan-nisar dil

musa ko barq-e-tur ka jalwa dikha diya

pahuncha taDap ke daur mera be-qarar dil

dekhi wo chashm-e-mast to aankhen si khul gain

jab hosh uD gae to hua hoshiyar dil

ifa-e-ahd-e-wasl na ifa-e-ahd-e-qatl

kis baat ka tumhaari kare e'tibar dil

ushshaq ki kami nahin mashuq chahiye

ho dil ka qadr-dan to sattar hazar dil

taskin de tasawwur-e-jaanan kise kise

be-tab idhar hai jaan udhar be-qarar dil

aaya KHayal kushta-e-simab dekh kar

ye KHak ho gaya hai koi be-qarar dil

aate hain fatihe ke liye roz dard-o-gham

hai aarzu-e-murda ka goya mazar dil

KHak aarzu-e-wasl karun ab tak ai 'amir'

ye bhi KHabar nahin kise karata hai pyar dil