ye to main kyunkar kahun tere KHaridaron mein hun

ye to maiñ kyūñkar kahūñ tere ḳharīdāroñ meñ huuñ

tū sarāpā naaz hai maiñ nāz-bardāroñ meñ huuñ

vasl kaisā tere nādīda ḳharīdāroñ meñ huuñ

vaah re qismat ki is par bhī gunahgāroñ meñ huuñ

hashr meñ itnā kahūñgā us se maiñ mahrūm-e-vasl

pāk-dāman tū hai maiñ kyūñkar gunahgāroñ meñ huuñ

nā-tavānī se hai tāqat naaz uThāne kī kahāñ

kah sakūñ kyūñkar ki tere nāz-bardāroñ meñ huuñ

jaan par sadma jigar meñ dard dil kā haal zaar

ghar kā ghar bīmār kis kis ke parastāroñ meñ huuñ

haa.e re ġhaflat nahīñ hai aaj tak itnī ḳhabar

kaun hai matlūb maiñ kis ke talab-gāroñ meñ huuñ

vo karishme shān-e-rahmat ne dikhā.e roz-e-hashr

chīñḳh uThā har be-gunāh maiñ bhī gunah-gāroñ meñ huuñ

vo mujhe rotā hai maiñ rotā huuñ us kī jaan ko

dil mere mātam meñ maiñ dil ke azā-dāroñ meñ huuñ

sub.h se matlab na gul se kaam kyā jānūñ unheñ

maiñ tumhāre sīna-chākoñ meñ dil-afgāroñ meñ huuñ

dil jigar donoñ kī lāsheñ hijr meñ haiñ sāmne

maiñ kabhī is ke kabhī us ke azādāroñ meñ huuñ

maiñ kisī qālib meñ huuñ ḳhālī udāsī se nahīñ

rañg huuñ yā bū huuñ murjhā.e hue hāroñ meñ huuñ

chheḌ dekho merī mayyat par jo aa.e ye kahā

tum vafādāroñ meñ ho yā maiñ vafādāroñ meñ huuñ

zāhido kaafī hai itnī baat baḳhshish ke liye

us ko shauq-e-maġhfirat hai maiñ gunahgāroñ meñ huuñ

kis tarah fariyād karte haiñ batā do qā.eda

ai asīrān-e-qafas maiñ nau-giraftāroñ meñ huuñ

hāl-e-zār apnā dikhā kar dil ne us se yuuñ kahā

kyuuñ isī muñh par ye kahte the maiñ dil-dāroñ meñ huuñ

be-gunāhoñ meñ chalā zāhid jo us ko DhūñDne

maġhfirat bolī idhar aa maiñ gunahgāroñ meñ huuñ

ḳhaal kahtā hai dikhā kar yaar kā husn-e-malīh

maiñ bhī us sarkār ke adnā namak-ḳhvāroñ meñ huuñ

ūñche ūñche mujrmoñ kī hogī pursish hashr meñ

kaun pūchhegā mujhe maiñ kin gunah-gāroñ meñ huuñ

vaqt-e-ārā.ish pahan kar tauq bolā vo hasīn

ab vo āzādī kahāñ maiñ bhī giraftāroñ meñ huuñ

chāra-sāzī kis se chāheñ ab marīz-e-dard-o-ġham

kahte haiñ iisā ki maiñ bhī un ke bīmāroñ meñ huuñ

be-gunāhī kā to da.avā un ke aage kyā majāl

Darte Darte muñh se niklā maiñ gunahgāroñ meñ huuñ

pūchhtā huuñ vaj.h-e-āzādī to kahtā hai ye sarv

maiñ kisī ke qadd-e-mauzūñ kī giraftāroñ meñ huuñ

aa chukā thā rahm us ko sun ke merī be-kasī

dard-e-zālim bol uThā maiñ us ke ġham-ḳhvāroñ meñ huuñ

soz-e-furqat dard-e-dil zaḳhm-e-jigar nāsūr-e-chashm

kuchh na pūchho mubtalā maiñ kitne āzāroñ meñ huuñ

sharm-o-shoḳhī donoñ gāhak haiñ ilāhī kyā karūñ

ek jins-e-be-haqīqat do ḳharīdāroñ meñ hoñ

phuul maiñ phūloñ meñ huuñ kāñTā huuñ kāñToñ meñ 'amīr'

yaar maiñ yāroñ meñ huuñ ayyār ayāroñ meñ huuñ

ye to main kyunkar kahun tere KHaridaron mein hun

tu sarapa naz hai main naz-bardaron mein hun

wasl kaisa tere nadida KHaridaron mein hun

wah re qismat ki is par bhi gunahgaron mein hun

hashr mein itna kahunga us se main mahrum-e-wasl

pak-daman tu hai main kyunkar gunahgaron mein hun

na-tawani se hai taqat naz uThane ki kahan

kah sakun kyunkar ki tere naz-bardaron mein hun

jaan par sadma jigar mein dard dil ka haal zar

ghar ka ghar bimar kis kis ke parastaron mein hun

hae re ghaflat nahin hai aaj tak itni KHabar

kaun hai matlub main kis ke talab-garon mein hun

wo karishme shan-e-rahmat ne dikhae roz-e-hashr

chinKH uTha har be-gunah main bhi gunah-garon mein hun

wo mujhe rota hai main rota hun us ki jaan ko

dil mere matam mein main dil ke aza-daron mein hun

subh se matlab na gul se kaam kya jaanun unhen

main tumhaare sina-chaakon mein dil-afgaron mein hun

dil jigar donon ki lashen hijr mein hain samne

main kabhi is ke kabhi us ke azadaron mein hun

main kisi qalib mein hun KHali udasi se nahin

rang hun ya bu hun murjhae hue haaron mein hun

chheD dekho meri mayyat par jo aae ye kaha

tum wafadaron mein ho ya main wafadaron mein hun

zahido kafi hai itni baat baKHshish ke liye

us ko shauq-e-maghfirat hai main gunahgaron mein hun

kis tarah fariyaad karte hain bata do qaeda

ai asiran-e-qafas main nau-giraftaron mein hun

haal-e-zar apna dikha kar dil ne us se yun kaha

kyun isi munh par ye kahte the main dil-daron mein hun

be-gunahon mein chala zahid jo us ko DhunDne

maghfirat boli idhar aa main gunahgaron mein hun

KHal kahta hai dikha kar yar ka husn-e-malih

main bhi us sarkar ke adna namak-KHwaron mein hun

unche unche mujrmon ki hogi pursish hashr mein

kaun puchhega mujhe main kin gunah-garon mein hun

waqt-e-araish pahan kar tauq bola wo hasin

ab wo aazadi kahan main bhi giraftaron mein hun

chaara-sazi kis se chahen ab mariz-e-dard-o-gham

kahte hain isa ki main bhi un ke bimaron mein hun

be-gunahi ka to dawa un ke aage kya majal

Darte Darte munh se nikla main gunahgaron mein hun

puchhta hun wajh-e-azadi to kahta hai ye sarw

main kisi ke qadd-e-mauzun ki giraftaron mein hun

aa chuka tha rahm us ko sun ke meri be-kasi

dard-e-zalim bol uTha main us ke gham-KHwaron mein hun

soz-e-furqat dard-e-dil zaKHm-e-jigar nasur-e-chashm

kuchh na puchho mubtala main kitne aazaron mein hun

sharm-o-shoKHi donon gahak hain ilahi kya karun

ek jins-e-be-haqiqat do KHaridaron mein hon

phul main phulon mein hun kanTa hun kanTon mein 'amir'

yar main yaron mein hun ayyar ayaron mein hun