gham nahin ji tan se nikla dil gaya

ġham nahīñ jī tan se niklā dil gayā

mil ga.e tum mujh ko sab kuchh mil gayā

bole vo siine pe mere rakh ke haath

kahiye ab to iztirāb-e-dil gayā

ai nigāh-e-yās terā ho burā

ghar talak rotā huā qātil gayā

teġh-e-qātil hai use bād-e-bahār

jab chalī vo ġhuncha-e-dil khil gayā

kūcha-e-gesū na haath aayā mujhe

kaale kosoñ saikḌoñ manzil gayā

miT gayā kājal kā til islāh meñ

mus.haf-e-āriz kā nuqta chhil gayā

āhanī dam par jahāñ bigḌe huzūr

lab hilā.e aap ne dil hil gayā

marhale tai kunj-e-uzlat meñ kiye

baiThe baiThe saiñkaḌoñ manzil gayā

barahman ko but mujhe tū ai sanam

jis ne jo māñgā ḳhudā se mil gayā

jam.a haiñ siine meñ paikāñ tiir ke

saiñkaḌoñ dil haiñ agar ik dil gayā

hal mere mushkil-kushā ne kī 'amīr'

le ke kaisī hī koī mushkil gayā

gham nahin ji tan se nikla dil gaya

mil gae tum mujh ko sab kuchh mil gaya

bole wo sine pe mere rakh ke hath

kahiye ab to iztirab-e-dil gaya

ai nigah-e-yas tera ho bura

ghar talak rota hua qatil gaya

tegh-e-qatil hai use baad-e-bahaar

jab chali wo ghuncha-e-dil khil gaya

kucha-e-gesu na hath aaya mujhe

kale koson saikDon manzil gaya

miT gaya kajal ka til islah mein

mushaf-e-ariz ka nuqta chhil gaya

aahani dam par jahan bigDe huzur

lab hilae aap ne dil hil gaya

marhale tai kunj-e-uzlat mein kiye

baiThe baiThe sainkaDon manzil gaya

barahman ko but mujhe tu ai sanam

jis ne jo manga KHuda se mil gaya

jama hain sine mein paikan tir ke

sainkaDon dil hain agar ek dil gaya

hal mere mushkil-kusha ne ki 'amir'

le ke kaisi hi koi mushkil gaya