غم نہیں جی تن سے نکلا دل گیا

غم نہیں جی تن سے نکلا دل گیا

مل گئے تم مجھ کو سب کچھ مل گیا

بولے وہ سینے پہ میرے رکھ کے ہاتھ

کہیے اب تو اضطراب دل گیا

اے نگاہ یاس تیرا ہو برا

گھر تلک روتا ہوا قاتل گیا

تیغ قاتل ہے اسے باد بہار

جب چلی وہ غنچۂ دل کھل گیا

کوچۂ گیسو نہ ہاتھ آیا مجھے

کالے کوسوں سیکڑوں منزل گیا

مٹ گیا کاجل کا تل اصلاح میں

مصحف عارض کا نقطہ چھل گیا

آہنی دم پر جہاں بگڑے حضور

لب ہلائے آپ نے دل ہل گیا

مرحلے طے کنج عزلت میں کیے

بیٹھے بیٹھے سینکڑوں منزل گیا

برہمن کو بت مجھے تو اے صنم

جس نے جو مانگا خدا سے مل گیا

جمع ہیں سینے میں پیکاں تیر کے

سینکڑوں دل ہیں اگر اک دل گیا

حل مرے مشکل کشا نے کی امیرؔ

لے کے کیسی ہی کوئی مشکل گیا