dil jo kahta hai mujhe zabt ki taqat hi nahin

dil jo kahtā hai mujhe zabt kī tāqat hī nahīñ

zabt kahtā hai taḌapne kī ijāzat hī nahīñ

ġham se chhūTūñ to maiñ kuchh aish kā sāmān karūñ

itnī is ġham-kada-e-dahr meñ fursat hī nahīñ

ab kis ummīd pe ham yaar kā darbār kareñ

pesh-tar thī jo ināyat vo ināyat hī nahīñ

talab-e-jām abas karte ho muñh phoḌ ke tum

mai-kasho aañkh meñ saaqī kī muravvat hī nahīñ

dhuup ko os ko nā-haq hai takalluf aa.eñ

kaun rokegā unheñ ghar meñ mere chhat hī nahīñ

haath meñ shāna hai ā.īna hai zaanū pe mudām

un se ulfat hai tumheñ jin meñ mohabbat hī nahīñ

dil jo kahta hai mujhe zabt ki taqat hi nahin

zabt kahta hai taDapne ki ijazat hi nahin

gham se chhuTun to main kuchh aish ka saman karun

itni is gham-kada-e-dahr mein fursat hi nahin

ab kis ummid pe hum yar ka darbar karen

pesh-tar thi jo inayat wo inayat hi nahin

talab-e-jam abas karte ho munh phoD ke tum

mai-kasho aankh mein saqi ki murawwat hi nahin

dhup ko os ko na-haq hai takalluf aaen

kaun rokega unhen ghar mein mere chhat hi nahin

hath mein shana hai aaina hai zanu pe mudam

un se ulfat hai tumhein jin mein mohabbat hi nahin