misal-e-tar-e-nazar nazar mein nahin

misal-e-tār-e-nazar nazar meñ nahīñ

is tarah ghar meñ huuñ ki ghar meñ nahīñ

hosh tak rāh-e-be-kHudī meñ haiñ gum

koī sāthī mirā safar meñ nahīñ

varaq-e-gul ko le uḌī hai nasīm

ḳhat mirā dast-e-nāma-bar meñ nahīñ

dekh lī aaj aañkh us gul kī

ab to nargis bhī kuchh nazar meñ nahīñ

ijz bandoñ kā kyuuñ pasand na ho

ki yahī to ḳhudā ke ghar meñ nahīñ

kis ke sar māriye ye bār-e-safar

rāh-zan koī rahguzar meñ nahīñ

dekhiye to isī meñ hai sab kuchh

kaun kahtā hai kuchh bashar meñ nahīñ

is qadar bhar gayā hai dāġhoñ se

ki jagah dard kī jigar meñ nahīñ

dekh kar un ko sab ye kahte haiñ

kyā parī meñ hai jo bashar meñ nahīñ

saare a.alam ke daaġh bhar letā

kyā karūñ maiñ jagah jigar meñ nahīñ

qurb-e-mun.im meñ pech-o-tāb kahāñ

ki girah rishta-e-guhar meñ nahīñ

kaun le jaa.e naama qātil tak

ḳhauf se jaan nāma-bar meñ nahīñ

rāh-rav-e-rāh-e-ishq huuñ juz dard

koī to shah mirī kamar meñ nahīñ

ho sake ḳhaak mehmānī-e-ġham

ek qatra lahū jigar meñ nahīñ

kījiye tar zabān-e-nashtar ko

ḳhuun itnā bhī ab jigar meñ nahīñ

māñgnā ho jo maañg le us se

kaun sī shai ḳhudā ke ghar meñ nahīñ

rishta-e-kahkashāñ meñ bijlī hai

teġh us turk kī kamar meñ nahīñ

aish kā naam hī sunā hai 'amīr'

DhūñD maarā jahān-bhar meñ nahīñ

misal-e-tar-e-nazar nazar mein nahin

is tarah ghar mein hun ki ghar mein nahin

hosh tak rah-e-be-kHudi mein hain gum

koi sathi mera safar mein nahin

waraq-e-gul ko le uDi hai nasim

KHat mera dast-e-nama-bar mein nahin

dekh li aaj aankh us gul ki

ab to nargis bhi kuchh nazar mein nahin

ijz bandon ka kyun pasand na ho

ki yahi to KHuda ke ghar mein nahin

kis ke sar mariye ye bar-e-safar

rah-zan koi rahguzar mein nahin

dekhiye to isi mein hai sab kuchh

kaun kahta hai kuchh bashar mein nahin

is qadar bhar gaya hai daghon se

ki jagah dard ki jigar mein nahin

dekh kar un ko sab ye kahte hain

kya pari mein hai jo bashar mein nahin

sare aalam ke dagh bhar leta

kya karun main jagah jigar mein nahin

qurb-e-munim mein pech-o-tab kahan

ki girah rishta-e-guhar mein nahin

kaun le jae nama qatil tak

KHauf se jaan nama-bar mein nahin

rah-raw-e-rah-e-ishq hun juz dard

koi to shah meri kamar mein nahin

ho sake KHak mehmani-e-gham

ek qatra lahu jigar mein nahin

kijiye tar zaban-e-nashtar ko

KHun itna bhi ab jigar mein nahin

mangna ho jo mang le us se

kaun si shai KHuda ke ghar mein nahin

rishta-e-kahkashan mein bijli hai

tegh us turk ki kamar mein nahin

aish ka nam hi suna hai 'amir'

DhunD mara jahan-bhar mein nahin