raushni nam ko bhi KHana-e-viran mein nahin

raushnī naam ko bhī ḳhāna-e-vīrāñ meñ nahīñ

haa.e bijlī kī chamak bhī shab-e-hijrāñ meñ nahīñ

mere pahlū meñ na dil hai na tirī muTThī meñ

phir huā kyā jo tirī zulf-e-pareshāñ meñ nahīñ

be-kasī dair se chillātī hai de kaun javāb

kah de ibrat hī koī gor-e-ġharībāñ meñ nahīñ

hai hayāt-e-abadī donoñ meñ lekin ḳhizr

āb-e-ḳhanjar kā maza chashma-e-haivāñ meñ nahīñ

ġhunche kahte haiñ ki kyā jald guzartī hai bahār

muskurā lene kī fursat bhī gulistāñ meñ nahīñ

baḌh ke bijlī se taḌap meñ sahī par kyā hāsil

shoḳhī-e-jumbish-e-mizhgāñ to rag-e-jāñ meñ nahīñ

apne mauqa.a pe har ik chiiz bhalī lagtī hai

kāñTe un phūloñ se achchhe jo garebāñ meñ nahīñ

paḌ gayā tafraqa aate ye ḳhizāñ ke aisā

rañg phūloñ meñ nahīñ phuul gulistāñ meñ nahīñ

qāzī-o-muhtasib-o-shaikH sab aa.e haiñ 'amīr'

ek tauba hai ki vo sohbat-e-rindāñ meñ nahīñ

raushni nam ko bhi KHana-e-viran mein nahin

hae bijli ki chamak bhi shab-e-hijran mein nahin

mere pahlu mein na dil hai na teri muTThi mein

phir hua kya jo teri zulf-e-pareshan mein nahin

be-kasi dair se chillati hai de kaun jawab

kah de ibrat hi koi gor-e-ghariban mein nahin

hai hayat-e-abadi donon mein lekin KHizr

aab-e-KHanjar ka maza chashma-e-haiwan mein nahin

ghunche kahte hain ki kya jald guzarti hai bahaar

muskura lene ki fursat bhi gulistan mein nahin

baDh ke bijli se taDap mein sahi par kya hasil

shoKHi-e-jumbish-e-mizhgan to rag-e-jaan mein nahin

apne mauqa pe har ek chiz bhali lagti hai

kanTe un phulon se achchhe jo gareban mein nahin

paD gaya tafraqa aate ye KHizan ke aisa

rang phulon mein nahin phul gulistan mein nahin

qazi-o-muhtasib-o-shaikH sab aae hain 'amir'

ek tauba hai ki wo sohbat-e-rindan mein nahin