ai tegh-e-yar mil ke gale se juda na ho

ai teġh-e-yār mil ke gale se judā na ho

ab rūThne kā vaqt nahīñ hai ḳhafā na ho

vo kyā ḳhirām-e-nāz hai jo fitna-zā na ho

vo fitna kyā hai jis se qiyāmat bapā na ho

husn-o-vafā kā saath to ai dil huā na ho

ma.ashūq naam usī kā hai jis meñ vafā na ho

merī nigāh-e-yās kī ik choT khā to le

be-dard phir maiñ dekhūñ ki dard-āshnā na ho

chaTkā chaman meñ ġhuncha to bolā jhijhak ke yaar

TuuTā kahīñ mirā hī ye band-e-qabā na ho

muusā paḌe haiñ ġhash meñ taḌaptī hai barq-e-tūr

parda tumhāre ruḳh se kahīñ haT gayā na ho

hañste haiñ ochhe zaḳhm to ḳhush ho ke tū bhī hañs

ye to hañsī kī baat hai zālim ḳhafā na ho

ai zo.af is qadar to ghulā mere jism ko

ā.īne meñ bhī shakl mirī rūnumā na ho

har vaar meñ namak kī bhī chuTkī chalī hī jaa.e

kis kaam kī taḌap hai vo jis meñ mazā na ho

hasrat se dekhtā huuñ jo un kī taraf 'amīr'

kahte haiñ dekho dekho koī dekhtā na ho

ai tegh-e-yar mil ke gale se juda na ho

ab ruThne ka waqt nahin hai KHafa na ho

wo kya KHiram-e-naz hai jo fitna-za na ho

wo fitna kya hai jis se qiyamat bapa na ho

husn-o-wafa ka sath to ai dil hua na ho

mashuq nam usi ka hai jis mein wafa na ho

meri nigah-e-yas ki ek choT kha to le

be-dard phir main dekhun ki dard-ashna na ho

chaTka chaman mein ghuncha to bola jhijhak ke yar

TuTa kahin mera hi ye band-e-qaba na ho

musa paDe hain ghash mein taDapti hai barq-e-tur

parda tumhaare ruKH se kahin haT gaya na ho

hanste hain ochhe zaKHm to KHush ho ke tu bhi hans

ye to hansi ki baat hai zalim KHafa na ho

ai zoaf is qadar to ghula mere jism ko

aaine mein bhi shakl meri runuma na ho

har war mein namak ki bhi chuTki chali hi jae

kis kaam ki taDap hai wo jis mein maza na ho

hasrat se dekhta hun jo un ki taraf 'amir'

kahte hain dekho dekho koi dekhta na ho