wasl ki raat to rahat se basar hone do

vasl kī raat to rāhat se basar hone do

shaam hī se hai ye dhamkī ki sahar hone do

nāvak-e-nāz kā pahlū meñ guzar hone do

kab se barbād hai ābād ye ghar hone do

dekhnā kaisī barābar kī paḌeñgī choTeñ

yaar kā ā.īna-ḳhāne meñ guzar hone do

vasl ho qatl ho jo madd-e-nazar ho hojāye

yā idhar hone do yā mujh ko udhar hone do

jis ne ye dard diyā hai vo davā bhī degā

lā-davā hai jo mirā dard-e-jigar hone do

maiñ ġharīb aur ġharīboñ kā ḳhudā vaalī hai

hone do saare zamāne ko udhar hone do

tilmilāne meñ taḌapne meñ kamī kī kis din

hai jo is par bhī ḳhafā dard-e-jigar hone do

kibr sab ḳhaak meñ mil jā.egā maġhrūroñ kā

ik zarā gor-e-ġharībāñ meñ guzar hone do

zikr ruḳhsat kā abhī se na kaaro baiTho bhī

jān-e-man raat guzarne do sahar hone do

ham tasavvur meñ na khīñcheñ ye na hogā ham se

laakh nāzuk hai hasīnoñ kī kamar hone do

tū sahī mujh se sivā sabr taḌap kar chīḳhe

mere dil tak to zarā us kā guzar hone do

vasl-e-dushman kī ḳhabar mujh se abhī kuchh na kaho

Thahro Thahro mujhe apnī to ḳhabar hone do

haa.e vo vasl kī shab un kā adā se kahnā

bāñdhne do mujhe juuḌe ko sahar hone do

jaag kar kāTte haiñ hijr meñ ham bhī rāteñ

rat-jage hote haiñ gar ġhair ke ghar hone do

shauq se tum ho dar-o-bām pe sargarm-e-ḳhirām

donoñ a.alam hoñ agar zer-o-zabar hone do

aane do aane do zulfoñ ko zarā gāloñ par

shāhid-e-shab ko ham-āġhosh-e-sahar hone do

ḳhvāb meñ aake vo bole mere armānoñ se

be-ḳhabar ko na ḳhabar-dār ḳhabar hone do

chheḌte kyuuñ ho javānī meñ hasīnoñ ko 'amīr'

raat hī bhar kā ye joban hai sahar hone do

wasl ki raat to rahat se basar hone do

sham hi se hai ye dhamki ki sahar hone do

nawak-e-naz ka pahlu mein guzar hone do

kab se barbaad hai aabaad ye ghar hone do

dekhna kaisi barabar ki paDengi choTen

yar ka aaina-KHane mein guzar hone do

wasl ho qatl ho jo madd-e-nazar ho hojaye

ya idhar hone do ya mujh ko udhar hone do

jis ne ye dard diya hai wo dawa bhi dega

la-dawa hai jo mera dard-e-jigar hone do

main gharib aur gharibon ka KHuda wali hai

hone do sare zamane ko udhar hone do

tilmilane mein taDapne mein kami ki kis din

hai jo is par bhi KHafa dard-e-jigar hone do

kibr sab KHak mein mil jaega maghruron ka

ek zara gor-e-ghariban mein guzar hone do

zikr ruKHsat ka abhi se na karo baiTho bhi

jaan-e-man raat guzarne do sahar hone do

hum tasawwur mein na khinchen ye na hoga hum se

lakh nazuk hai hasinon ki kamar hone do

tu sahi mujh se siwa sabr taDap kar chiKHe

mere dil tak to zara us ka guzar hone do

wasl-e-dushman ki KHabar mujh se abhi kuchh na kaho

Thahro Thahro mujhe apni to KHabar hone do

hae wo wasl ki shab un ka ada se kahna

bandhne do mujhe juDe ko sahar hone do

jag kar kaTte hain hijr mein hum bhi raaten

rat-jage hote hain gar ghair ke ghar hone do

shauq se tum ho dar-o-baam pe sargarm-e-KHiram

donon aalam hon agar zer-o-zabar hone do

aane do aane do zulfon ko zara galon par

shahid-e-shab ko ham-aghosh-e-sahar hone do

KHwab mein aake wo bole mere armanon se

be-KHabar ko na KHabar-dar KHabar hone do

chheDte kyun ho jawani mein hasinon ko 'amir'

raat hi bhar ka ye joban hai sahar hone do