dusra kaun hai jahan tu hai

dūsrā kaun hai jahāñ tū hai

kaun jaane tujhe kahāñ tū hai

laakh pardoñ meñ tū hai be-parda

sau nishānoñ pe be-nishāñ tū hai

tū hai ḳhalvat meñ tū hai jalvat meñ

kahīñ pinhāñ kahīñ ayaañ tū hai

nahīñ tere sivā yahāñ koī

mezbāñ tū hai mehmāñ tū hai

jism kahtā hai jaan hai tū hī

jaan kahtī hai jān-e-jāñ tū hai

na makāñ meñ na lā-makāñ meñ kuchh

jalva-farmā yahāñ vahāñ tū hai

rañg terā ye chaman meñ bū terī

ḳhuub dekhā to bāġhbāñ tū hai

mahram-e-rāz to bahut haiñ 'amīr'

jis ko kahte haiñ rāz-dāñ tū hai

dusra kaun hai jahan tu hai

kaun jaane tujhe kahan tu hai

lakh pardon mein tu hai be-parda

sau nishanon pe be-nishan tu hai

tu hai KHalwat mein tu hai jalwat mein

kahin pinhan kahin ayan tu hai

nahin tere siwa yahan koi

mezban tu hai mehman tu hai

jism kahta hai jaan hai tu hi

jaan kahti hai jaan-e-jaan tu hai

na makan mein na la-makan mein kuchh

jalwa-farma yahan wahan tu hai

rang tera ye chaman mein bu teri

KHub dekha to baghban tu hai

mahram-e-raaz to bahut hain 'amir'

jis ko kahte hain raaz-dan tu hai