aaina tere husn ka dil bhi hai jigar bhi

ā.īna tire husn kā dil bhī hai jigar bhī

hai ek hī sūrat ki idhar bhī hai udhar bhī

ḳhurshīd bhī us nuur kā maz.har hai qamar bhī

ai be-basro kuchh tumheñ aatā hai nazar bhī

saaqī huuñ tirī bazm meñ maiñ tishna jigar bhī

sadqe tirī āñkhoñ ke koī jaam idhar bhī

to chashm-e-suḳhan-go se mujhe pūchh de itnā

haiñ bāteñ hī bāteñ ki hai kuchh madd-e-nazar bhī

kumhlā.e chale jaate haiñ gul kis kī hai aamad

ghabrā.ī huī phirtī hai kuchh bād-e-sahar bhī

kyā paas nahīñ mere jo tum ġhair se māñgo

pahlū meñ mere dil bhī hai siine meñ jigar bhī

allāh re nā-taqatī-o-zo'f kā a.alam

maiñ kyā ki pahuñchtī nahīñ vaañ merī ḳhabar bhī

muñh mahr-e-falak kā jo idhar ko nahīñ phirtā

shāyad koī ma.ashūq tumhīñ sā hai udhar bhī

kyā jāniye kyā haal hai yārān-e-adam kā

ik umr huī hai nahīñ aa.ī hai ḳhabar bhī

vo chehra-e-pur-nūr hai ik barq-e-tajallī

kis aañkh se dekhūñ maiñ Thahartī hai nazar bhī

but-ḳhāne se dil apnā na ka.abe se phirā hai

kuchh soch ke anjām idhar bhī hai udhar bhī

ruk ruk ke jo chaltā hai gale par mere ḳhanjar

kuchh dil meñ hai qātil ke tarahhum kā asar bhī

kis kis kā gilā kījiye yā-rab ki shab-e-vasl

dushman hai muazzin kī tarah murġh-e-sahar bhī

kyā tañg hai jallād mirī saḳhtī-e-jāñ se

har vaar pe kahtā hai ki zālim kahīñ mar bhī

joban mirī āñkhoñ meñ phirā gul-badanoñ kā

gadrā.e hue baaġh meñ dekhe jo samar bhī

raftār tirī dekh ke kahte haiñ farishte

allāhu ġhanī ek hī fitna hai bashar bhī

maqsūd maza hai to 'amīr' aur kaho sher

hoñge inhīñ phūloñ inhīñ pattoñ meñ samar bhī

aaina tere husn ka dil bhi hai jigar bhi

hai ek hi surat ki idhar bhi hai udhar bhi

KHurshid bhi us nur ka mazhar hai qamar bhi

ai be-basro kuchh tumhein aata hai nazar bhi

saqi hun teri bazm mein main tishna jigar bhi

sadqe teri aankhon ke koi jam idhar bhi

to chashm-e-suKHan-go se mujhe puchh de itna

hain baaten hi baaten ki hai kuchh madd-e-nazar bhi

kumhlae chale jate hain gul kis ki hai aamad

ghabrai hui phirti hai kuchh baad-e-sahar bhi

kya pas nahin mere jo tum ghair se mango

pahlu mein mere dil bhi hai sine mein jigar bhi

allah re na-taqati-o-zo'f ka aalam

main kya ki pahunchti nahin wan meri KHabar bhi

munh mahr-e-falak ka jo idhar ko nahin phirta

shayad koi mashuq tumhin sa hai udhar bhi

kya jaaniye kya haal hai yaran-e-adam ka

ek umr hui hai nahin aai hai KHabar bhi

wo chehra-e-pur-nur hai ek barq-e-tajalli

kis aankh se dekhun main Thaharti hai nazar bhi

but-KHane se dil apna na kabe se phira hai

kuchh soch ke anjam idhar bhi hai udhar bhi

ruk ruk ke jo chalta hai gale par mere KHanjar

kuchh dil mein hai qatil ke tarahhum ka asar bhi

kis kis ka gila kijiye ya-rab ki shab-e-wasl

dushman hai muazzin ki tarah murgh-e-sahar bhi

kya tang hai jallad meri saKHti-e-jaan se

har war pe kahta hai ki zalim kahin mar bhi

joban meri aankhon mein phira gul-badanon ka

gadrae hue bagh mein dekhe jo samar bhi

raftar teri dekh ke kahte hain farishte

allahu ghani ek hi fitna hai bashar bhi

maqsud maza hai to 'amir' aur kaho sher

honge inhin phulon inhin patton mein samar bhi