tabe-e-din kabhi daulat pe na shaida hoga

tābe-e-dīn kabhī daulat pe na shaidā hogā

pairav-e-sher-e-ḳhudā kyā sag-e-duniyā hogā

yahī kāhish hai to kaisā tan-e-lāġhar kā patā

aaj hai mū-e-kamar kal par-e-anqā hogā

ma.arifat ke liye hai tark-e-ta.alluq lāzim

ḳhuub samjhegā vo tanhā ko jo tanhā hogā

marg ke ba.ad hai bedār diloñ ko ārām

niiñd bhar kar vahī so.egā jo jaagā hogā

TukḌe TukḌe nahīñ be-vajah mirā dil saaqī

koī shīsha kisī mai-ḳhāne meñ TuuTā hogā

ham ne andesha-e-pīrī meñ javānī kaaTī

raat bhar ḳhauf rahā sub.h ko ab kyā hogā

dil ko āġhāz-e-mohabbat meñ na samjho thoḌā

baḌhte baḌhte yahī qatra kabhī dariyā hogā

be-vafā.ī se tumhārī yahī har dam hai ḳhayāl

tum jo apne na hue kaun kisī kā hogā

ye na hogā ki jagah dost kī ḳhālī dekhūñ

dil bhar aa.egā tahī mai se jo miinā hogā

shahr ko chhoḌ ke kyuuñ dasht meñ vahshī jaa.eñ

ḳhaak uḌāte jidhar jā.eñge sahrā hogā

kyā huā laash pe merī jo vo hañstā aayā

chhup ke aġhyār se tanhā.ī meñ royā hogā

ishq-e-mizhgāñ meñ kahāñ sūrat-e-ārām 'amīr'

niiñd uḌ jā.egī bistar pe jo kāñTā hogā

tabe-e-din kabhi daulat pe na shaida hoga

pairaw-e-sher-e-KHuda kya sag-e-duniya hoga

yahi kahish hai to kaisa tan-e-laghar ka pata

aaj hai mu-e-kamar kal par-e-anqa hoga

marifat ke liye hai tark-e-talluq lazim

KHub samjhega wo tanha ko jo tanha hoga

marg ke baad hai bedar dilon ko aaram

nind bhar kar wahi soega jo jaga hoga

TukDe TukDe nahin be-wajah mera dil saqi

koi shisha kisi mai-KHane mein TuTa hoga

hum ne andesha-e-piri mein jawani kaTi

raat bhar KHauf raha subh ko ab kya hoga

dil ko aaghaz-e-mohabbat mein na samjho thoDa

baDhte baDhte yahi qatra kabhi dariya hoga

be-wafai se tumhaari yahi har dam hai KHayal

tum jo apne na hue kaun kisi ka hoga

ye na hoga ki jagah dost ki KHali dekhun

dil bhar aaega tahi mai se jo mina hoga

shahr ko chhoD ke kyun dasht mein wahshi jaen

KHak uDate jidhar jaenge sahra hoga

kya hua lash pe meri jo wo hansta aaya

chhup ke aghyar se tanhai mein roya hoga

ishq-e-mizhgan mein kahan surat-e-aram 'amir'

nind uD jaegi bistar pe jo kanTa hoga