jalwa-gar yar magar qatl-gah-e-am mein hai

jalva-gar yaar magar qatl-gah-e-ām meñ hai

jab bulātā huuñ maiñ suntā huuñ qazā kaam meñ hai

nashsha-e-aish mujhe gardish-e-ayyām meñ hai

mai-e-be-dard agar hai to mere jaam meñ hai

daur jaarī hai har vaqt mai-e-gulgūñ kā

paḌh le saaqī yahī tahrīr ḳhat-e-jām meñ hai

daf.atan rañg badal detī hai ye a.alam kā

chaal ai mahr tirī gardish-e-ayyām meñ hai

na huā nāla-e-mazlūm se zālim bedār

phuñk chukā suur ye murda abhī ārām meñ hai

ism-e-āzam ye sulaimāñ ko tafāḳhur hai abas

sau tarah kā asar allāh ke har naam meñ hai

dil se mere ki zabāñ se tirī pūchhe koī

ġhair kyā jaane maza kyā tire dushnām meñ hai

aañkh ḳhālī na dikhā lutf bhī kar ai saaqī

jaam hī jaam hai yā mai bhī kahīñ jaam meñ hai

jis taraf dekhiye khole hue āġhosh hai huur

sarfaroshī kā maza lashkar-e-islām meñ hai

ulfat-e-zulf meñ hai tā.ir-e-dil ashk-fishāñ

āb-o-dānā mirī qismat kā usī daam meñ hai

surma ai yaar lagāyā ki jagāyā jaadū

kyā balā sahar tirī chashm-e-siyah-fām meñ hai

paḌ gayā garmī-e-furqat se phapholā dil meñ

jā-e-mai-dāna añgūr mere jaam meñ hai

lab pe tū ne jo masī mal-ke jamāyā lākhā

khul gayā shāh-e-badaḳhshāñ kā amal shaam meñ hai

yaad gesū se kahāñ josh-e-junūñ meñ ārām

maiñ huuñ āzād to kyā ruuh mirī daam meñ hai

Daal de mujh se balā nosh ko ḳham ke muñh meñ

ye to ik ghūñT hai saaqī jo tire jaam meñ hai

murġh-e-dil ḳhaak phañse zulf par afshāñ chiḌko

daam hī daam hai daana bhī kahīñ daam meñ hai

aa gayā roz-e-qiyāmat na phire mere nasīb

jaag uThe murde ye ġhāfil abhī ārām meñ hai

hai laḌakpan meñ bajā ḳhaak se insān ko uns

aaqil āġhāz se andesha-e-anjām meñ hai

naam kā naam taḳhallus kā taḳhallus hai 'amīr'

ye baḌā husn-e-ḳhudā-dād mire naam meñ hai

jalwa-gar yar magar qatl-gah-e-am mein hai

jab bulata hun main sunta hun qaza kaam mein hai

nashsha-e-aish mujhe gardish-e-ayyam mein hai

mai-e-be-dard agar hai to mere jam mein hai

daur jari hai har waqt mai-e-gulgun ka

paDh le saqi yahi tahrir KHat-e-jam mein hai

dafatan rang badal deti hai ye aalam ka

chaal ai mahr teri gardish-e-ayyam mein hai

na hua nala-e-mazlum se zalim bedar

phunk chuka sur ye murda abhi aaram mein hai

ism-e-azam ye sulaiman ko tafaKHur hai abas

sau tarah ka asar allah ke har nam mein hai

dil se mere ki zaban se teri puchhe koi

ghair kya jaane maza kya tere dushnam mein hai

aankh KHali na dikha lutf bhi kar ai saqi

jam hi jam hai ya mai bhi kahin jam mein hai

jis taraf dekhiye khole hue aaghosh hai hur

sarfaroshi ka maza lashkar-e-islam mein hai

ulfat-e-zulf mein hai tair-e-dil ashk-fishan

aab-o-dana meri qismat ka usi dam mein hai

surma ai yar lagaya ki jagaya jadu

kya bala sahar teri chashm-e-siyah-fam mein hai

paD gaya garmi-e-furqat se phaphola dil mein

ja-e-mai-dana angur mere jam mein hai

lab pe tu ne jo masi mal-ke jamaya lakha

khul gaya shah-e-badaKHshan ka amal sham mein hai

yaad gesu se kahan josh-e-junun mein aaram

main hun aazad to kya ruh meri dam mein hai

Dal de mujh se bala nosh ko KHam ke munh mein

ye to ek ghunT hai saqi jo tere jam mein hai

murgh-e-dil KHak phanse zulf par afshan chiDko

dam hi dam hai dana bhi kahin dam mein hai

aa gaya roz-e-qiyamat na phire mere nasib

jag uThe murde ye ghafil abhi aaram mein hai

hai laDakpan mein baja KHak se insan ko uns

aaqil aaghaz se andesha-e-anjam mein hai

nam ka nam taKHallus ka taKHallus hai 'amir'

ye baDa husn-e-KHuda-dad mere nam mein hai