hashr mein jis ne kaha banda KHata-karon mein hai

hashr meñ jis ne kahā banda ḳhatā-kāroñ meñ hai

rahmat us kī bolī chal tū kin gunahgāroñ meñ hai

maġhfirat kā tū jo tālib hai to zāhid aa idhar

pyaar kartī hai vo mai-ḳhvāroñ ko mai-ḳhvāroñ meñ hai

maiñ huuñ aajiz aur us ko ājizī mahbūb hai

be-niyāzī us kī mere nāz-bardāroñ meñ hai

DhūñDhnā hai us ko ai zāhid to apne dil meñ DhūñD

chhat meñ ka.abe kī na vo ka.abe kī dīvāroñ meñ hai

shoḳh vo ham muztarib vo nāznīñ ham nā-tavāñ

miltī jultī yaar se hai baat jo yāroñ meñ hai

hashr ke din dekh kar āġhosh-e-rahmat meñ mujhe

pūchhtī hai ḳhalq tū kis ke gunahgāroñ meñ hai

kyā numūd-e-āftāb-e-hashr dāġhoñ ke huzūr

vo bhī ik chhoTā sā añgārā un añgāra meñ hai

us ko ai saaqī uThā de kaam kyā us kā yahāñ

ye takalluf bhī hai kyā mai-kash jo mai-ḳhvāroñ meñ hai

husn-o-ismat donoñ yakjā hoñ ye mumkin hī nahīñ

ghar meñ vo parda-nashīñ hai shor bāzāroñ meñ hai

poñchhtī hai mere aañsū marg-e-dushman kī ḳhushī

huuñ maiñ vo nāshād shādī mere ġham-ḳhvāroñ meñ hai

abr jab ghir ghir ke aatā hai pilātā hai sharāb

ke us kī aaj saaqī ban ke mai-ḳhvāroñ meñ hai

lene aa.ī hai ajal kis ko adam ko jaa.e kaun

itnī tāqat ab kahāñ furqat ke bīmāroñ meñ hai

sūrat-e-ā.īna har sūrat se hai vo āshnā

yaar agar yāroñ meñ hai ayyār ayāroñ meñ hai

ghar vahī hai hijr ke din bhī jo roz-e-vasl thā

dil meñ vahshat hai daroñ meñ hai na dīvāroñ meñ hai

hai sadā hātim kī dar par mere aaqā ke 'amīr'

ye ḳhudā rakhe ajab darbār darbāroñ meñ hai

hashr mein jis ne kaha banda KHata-karon mein hai

rahmat us ki boli chal tu kin gunahgaron mein hai

maghfirat ka tu jo talib hai to zahid aa idhar

pyar karti hai wo mai-KHwaron ko mai-KHwaron mein hai

main hun aajiz aur us ko aajizi mahbub hai

be-niyazi us ki mere naz-bardaron mein hai

DhunDhna hai us ko ai zahid to apne dil mein DhunD

chhat mein kabe ki na wo kabe ki diwaron mein hai

shoKH wo hum muztarib wo naznin hum na-tawan

milti julti yar se hai baat jo yaron mein hai

hashr ke din dekh kar aaghosh-e-rahmat mein mujhe

puchhti hai KHalq tu kis ke gunahgaron mein hai

kya numud-e-aftab-e-hashr daghon ke huzur

wo bhi ek chhoTa sa angara un angara mein hai

us ko ai saqi uTha de kaam kya us ka yahan

ye takalluf bhi hai kya mai-kash jo mai-KHwaron mein hai

husn-o-ismat donon yakja hon ye mumkin hi nahin

ghar mein wo parda-nashin hai shor bazaron mein hai

ponchhti hai mere aansu marg-e-dushman ki KHushi

hun main wo nashad shadi mere gham-KHwaron mein hai

abr jab ghir ghir ke aata hai pilata hai sharab

ke us ki aaj saqi ban ke mai-KHwaron mein hai

lene aai hai ajal kis ko adam ko jae kaun

itni taqat ab kahan furqat ke bimaron mein hai

surat-e-aina har surat se hai wo aashna

yar agar yaron mein hai ayyar ayaron mein hai

ghar wahi hai hijr ke din bhi jo roz-e-wasl tha

dil mein wahshat hai daron mein hai na diwaron mein hai

hai sada hatim ki dar par mere aaqa ke 'amir'

ye KHuda rakhe ajab darbar darbaron mein hai