pahle nigah phir meri dushman haya hui

pahle nigāh phir mirī dushman hayā huī

vo ek thī ye dūsrī ai dilrubā huī

laTkā.e kyuuñ ga.e haiñ ye kaisī sazā huī

gesū to ḳhud balā the unheñ kyā balā huī

maujūd aa ke vasl meñ bhī lo hayā huī

ik jaan kā azaab huī sharm kyā huī

gaalī bhī pyāre muñh se tire ḳhush-numā huī

be-jā bhī baat tuune kahī to bajā huī

hai baḳhshne na baḳhshne meñ us ko iḳhtiyār

tū hai gunāhgār kahe jā ḳhatā huī

baiThe hue kaleje meñ lete ho chuTkiyāñ

ai jaan dil lagāne kī achchhī sazā huī

kahtā hai un se ā.īna sub.h-e-shab-e-visāl

hai hai ye rāt-bhar meñ tirī shakl kyā huī

ġhamze se apne bole vo kushtoñ ko dekh kar

lo jī mirī galī na huī karbalā huī

rahm aa gayā karīm ko muhtāj dekh kar

hājat hī us ġharīb kī hājat-ravā huī

ab aañkh kyā milā.egī mastoñ se duḳht-e-raz

qaazī ke ghar meñ paḌ ke baḌī pārsā huī

kyā kyā libās shān-e-karam ke haiñ dekhnā

ḳhāk-e-shifā huī kahīñ āb-e-baqā huī

ik 'umr ho ga.ī shab-e-furqat ko mere ghar

ab bhī jo ibtidā hai to bas intihā huī

dekhā nigāh-e-garm se aaj us ne ġhair ko

maqbūl kis jale hue dil kī duā huī

hai vasl meñ to hijr se bhī baḌh ke iztirāb

taḌpāne meñ to dard se duunī davā huī

ma.ashūq sabza-rañg thī jab tak thī sabz-posh

qātil libās-e-surḳh pahan kar hinā huī

shikvā kiyā jafā kā to bole ki nā-sipās

merī jafā hī se to numūd-e-vafā huī

jī ḳhvāb rañg hosh yakāyak sab uḌ ga.e

roz-e-firāq tez kuchh aisī havā huī

āñkhoñ ke aage aake khaḌī ho ga.ī vo shakl

dam-bhar jahāñ palak se palak āshnā huī

hai chiiz ek adā-o-qazā is qadar hai farq

sīdhī nazar adā huī tirchhī qazā huī

ā.īna āshiqoñ se sivā hai sitam nasīb

pahle isī ġharīb pe mashq-e-adā huī

maqtal ko vo chale to haTāne ko bhiiḌ bhaaḌ

teġh-e-nigāh khīñch ke aa.e adā huī

ā.īne ne javāb diyā baat baat kā

lo aaj to khulī khulī ai dilrubā huī

ghabrā rahe ho hashr meñ kyuuñ is qadar 'amīr'

itnī hī sī to baat hai kah do ḳhatā huī

pahle nigah phir meri dushman haya hui

wo ek thi ye dusri ai dilruba hui

laTkae kyun gae hain ye kaisi saza hui

gesu to KHud bala the unhen kya bala hui

maujud aa ke wasl mein bhi lo haya hui

ek jaan ka azab hui sharm kya hui

gali bhi pyare munh se tere KHush-numa hui

be-ja bhi baat tune kahi to baja hui

hai baKHshne na baKHshne mein us ko iKHtiyar

tu hai gunahgar kahe ja KHata hui

baiThe hue kaleje mein lete ho chuTkiyan

ai jaan dil lagane ki achchhi saza hui

kahta hai un se aaina subh-e-shab-e-visal

hai hai ye raat-bhar mein teri shakl kya hui

ghamze se apne bole wo kushton ko dekh kar

lo ji meri gali na hui karbala hui

rahm aa gaya karim ko muhtaj dekh kar

hajat hi us gharib ki hajat-rawa hui

ab aankh kya milaegi maston se duKHt-e-raz

qazi ke ghar mein paD ke baDi parsa hui

kya kya libas shan-e-karam ke hain dekhna

KHak-e-shifa hui kahin aab-e-baqa hui

ek 'umr ho gai shab-e-furqat ko mere ghar

ab bhi jo ibtida hai to bas intiha hui

dekha nigah-e-garm se aaj us ne ghair ko

maqbul kis jale hue dil ki dua hui

hai wasl mein to hijr se bhi baDh ke iztirab

taDpane mein to dard se duni dawa hui

mashuq sabza-rang thi jab tak thi sabz-posh

qatil libas-e-surKH pahan kar hina hui

shikwa kiya jafa ka to bole ki na-sipas

meri jafa hi se to numud-e-wafa hui

ji KHwab rang hosh yakayak sab uD gae

roz-e-firaq tez kuchh aisi hawa hui

aankhon ke aage aake khaDi ho gai wo shakl

dam-bhar jahan palak se palak aashna hui

hai chiz ek ada-o-qaza is qadar hai farq

sidhi nazar ada hui tirchhi qaza hui

aaina aashiqon se siwa hai sitam nasib

pahle isi gharib pe mashq-e-ada hui

maqtal ko wo chale to haTane ko bhiD bhaD

tegh-e-nigah khinch ke aae ada hui

aaine ne jawab diya baat baat ka

lo aaj to khuli khuli ai dilruba hui

ghabra rahe ho hashr mein kyun is qadar 'amir'

itni hi si to baat hai kah do KHata hui