har kali kahti hai khul kar tere diwane se

har kalī kahtī hai khul kar tire dīvāne se

dekh niklī hai parī saj ke parī-ḳhāne se

sāqiyā jaate haiñ pyāse tire mai-ḳhāne se

ghoñT do ghoñT chhalakte hue paimāne se

but bane baiThe haiñ but jī mirā ghabrātā hai

uTh ke ka.abe ko chalā jā.ūñgā but-ḳhāne se

hasrateñ dekhīñ mere dil meñ to bole shab-e-vasl

lipTī haiñ kyuuñ ye balā.eñ mere dīvāne se

lā-makāñ ke jo kitāboñ meñ likhe haiñ ausāf

milte julte haiñ vo kuchh kuchh mere vīrāne se

dil mirā toḌ diyā aaj mere saaqī ne

mai pilā.ī bhī to TuuTe hue paimāne se

rahm un par to kar uThne de kabhī to un ko

haiñ ġhazab meñ tirī āñkheñ tire sharmāne se

shaiḳh jī rahtī haiñ kyuuñ surḳh tumhārī āñkheñ

shab ko kyā laal parī aatī hai mai-ḳhāne se

raqs karne lagā dam bhar meñ chhalak kar saaqī

kah diyā jhuk ke ye kyā shīshe ne paimāne se

maiñ ne zulfoñ kī sanā kī to kahā chup bhī raho

dam ulajhtā hai is uljhe hue afsāne se

dil churāyā hai to āñkheñ na churāo dekho

chorī khulne kā hai Dar chor ke ghabrāne se

shaiḳh jī aa.e the rindoñ meñ kaisī thī kasīf

kyā nahā-dho ke nikal aa.e haiñ mai-ḳhāne se

kal nazar aa.e the jaate hue masjid ko 'amīr'

aaj dekhā to chale aate haiñ maiḳhāne se

har kali kahti hai khul kar tere diwane se

dekh nikli hai pari saj ke pari-KHane se

saqiya jate hain pyase tere mai-KHane se

ghonT do ghonT chhalakte hue paimane se

but bane baiThe hain but ji mera ghabraata hai

uTh ke kabe ko chala jaunga but-KHane se

hasraten dekhin mere dil mein to bole shab-e-wasl

lipTi hain kyun ye balaen mere diwane se

la-makan ke jo kitabon mein likhe hain ausaf

milte julte hain wo kuchh kuchh mere virane se

dil mera toD diya aaj mere saqi ne

mai pilai bhi to TuTe hue paimane se

rahm un par to kar uThne de kabhi to un ko

hain ghazab mein teri aankhen tere sharmane se

shaiKH ji rahti hain kyun surKH tumhaari aankhen

shab ko kya lal pari aati hai mai-KHane se

raqs karne laga dam bhar mein chhalak kar saqi

kah diya jhuk ke ye kya shishe ne paimane se

main ne zulfon ki sana ki to kaha chup bhi raho

dam ulajhta hai is uljhe hue afsane se

dil churaya hai to aankhen na churao dekho

chori khulne ka hai Dar chor ke ghabrane se

shaiKH ji aae the rindon mein kaisi thi kasif

kya naha-dho ke nikal aae hain mai-KHane se

kal nazar aae the jate hue masjid ko 'amir'

aaj dekha to chale aate hain maiKHane se