chamkae hain kya dagh-e-jigar aah-e-rasa ne

chamkā.e haiñ kyā dāġh-e-jigar āh-e-rasā ne

in phūloñ meñ aur aag lagā dī hai sabā ne

jaa.e tapish-e-dil mirī kis kis ko bulāne

muñh terī tarah mujh se chhupāyā hai qazā ne

parda ruḳh-e-mahbūb se ulTā hai havā ne

ye phuul khilāyā hai nayā bād-e-sabā ne

yaañ haath uThāyā hai duā ke liye maiñ ne

tāsīr se vaañ haath uThāyā hai duā ne

bulbul jo huī zab.h to ġhunche ye pukāre

chhoḌā hai shagūfa ye nayā bād-e-sabā ne

lo vasl meñ betābī-e-dil ho ga.ī duunī

kī aur kumak dard-e-mohabbat kī davā ne

kis kis ke chale jaur shab vasl meñ mujh par

chakme diye shoḳhī ne to kī chaal hayā ne

bismil hī mujhe chhoḌ gayā ḳhanjar-e-qātil

afsos vafā mujh se na kī us kī jafā ne

barmā ke mere dil ko jigar tak utar aa.iiñ

kyā kaam liyā nīchī nigāhoñ se hayā ne

lau afv-e-ma.āsī kī lagā.e raheñ aasī

ke ko bahut aate haiñ baḳhshish ke bahāne

kaam aa ga.ī shoḳhī ki naqāb us ne ulaT dī

shab ko to mujhe maar hī Daalā thā hayā ne

barsāt meñ bhī ye na ubharnā thā na ubhrī

chhīñTe diye kyā kyā mirī tauba ko ghaTā ne

us dast-e-hinā.ī pe gale kaT ga.e kitne

piise haiñ hazāroñ hī ke dil pis ke hinā ne

ghabrā.ī huī teġh ba-kaf phirtī hai har samt

kyā jaane diyā barq ko kyā hukm ghaTā ne

aa.ī hai dam-e-naz.a mere ghar shab-e-furqat

gherā hai bure vaqt meñ is kaalī balā ne

ik aan meñ jab bhar diye jal thal to maiñ samjhā

vāqif tirī ke se kiyā sab ko ghaTā ne

us dast-e-nigārīñ ko kiyā hai jo bhabhūkā

dil meñ mere ik aag lagā dī hai hinā ne

tauba kaaro tauba kahīñ mai-ḳhāne se haTtī

koḌe use bijlī ke lagā.e haiñ ghaTā ne

kambaḳht mere ghar se nikaltī hī nahīñ hai

māman mere maskan ko banāyā hai balā ne

us gul ke jo hāthoñ ko banānā thā bhabhūkā

laale kā lahū chuus liyā barg-e-hinā ne

allāh re merī shab-e-hijrāñ kī syāhī

sau baar pukārā mujhe ghabrā ke balā ne

shikva jo kiyā sañg-dilī kā to vo bole

but ham ko banāyā hai tumhāre hī ḳhudā ne

har gaam ye laġhzish thī rah-e-ishq meñ lekin

phisle to sambhālā hameñ taslīm-o-razā ne

gherā to bahut zulf-e-butāñ ne mujhe lekin

ab tak to is aafat se bachāyā hai ḳhudā ne

dil pis ke 'amīr' un ke qadam tak bhī na pahuñchā

aur bose liye hāthoñ ke bhī pis ke hinā ne

chamkae hain kya dagh-e-jigar aah-e-rasa ne

in phulon mein aur aag laga di hai saba ne

jae tapish-e-dil meri kis kis ko bulane

munh teri tarah mujh se chhupaya hai qaza ne

parda ruKH-e-mahbub se ulTa hai hawa ne

ye phul khilaya hai naya baad-e-saba ne

yan hath uThaya hai dua ke liye main ne

tasir se wan hath uThaya hai dua ne

bulbul jo hui zabh to ghunche ye pukare

chhoDa hai shagufa ye naya baad-e-saba ne

lo wasl mein betabi-e-dil ho gai duni

ki aur kumak dard-e-mohabbat ki dawa ne

kis kis ke chale jaur shab wasl mein mujh par

chakme diye shoKHi ne to ki chaal haya ne

bismil hi mujhe chhoD gaya KHanjar-e-qatil

afsos wafa mujh se na ki us ki jafa ne

barma ke mere dil ko jigar tak utar aain

kya kaam liya nichi nigahon se haya ne

lau afw-e-maasi ki lagae rahen aasi

ke ko bahut aate hain baKHshish ke bahane

kaam aa gai shoKHi ki naqab us ne ulaT di

shab ko to mujhe mar hi Dala tha haya ne

barsat mein bhi ye na ubharna tha na ubhri

chhinTe diye kya kya meri tauba ko ghaTa ne

us dast-e-hinai pe gale kaT gae kitne

pise hain hazaron hi ke dil pis ke hina ne

ghabrai hui tegh ba-kaf phirti hai har samt

kya jaane diya barq ko kya hukm ghaTa ne

aai hai dam-e-naza mere ghar shab-e-furqat

ghera hai bure waqt mein is kali bala ne

ek aan mein jab bhar diye jal thal to main samjha

waqif teri ke se kiya sab ko ghaTa ne

us dast-e-nigarin ko kiya hai jo bhabhuka

dil mein mere ek aag laga di hai hina ne

tauba karo tauba kahin mai-KHane se haTti

koDe use bijli ke lagae hain ghaTa ne

kambaKHt mere ghar se nikalti hi nahin hai

maman mere maskan ko banaya hai bala ne

us gul ke jo hathon ko banana tha bhabhuka

lale ka lahu chus liya barg-e-hina ne

allah re meri shab-e-hijran ki syahi

sau bar pukara mujhe ghabra ke bala ne

shikwa jo kiya sang-dili ka to wo bole

but hum ko banaya hai tumhaare hi KHuda ne

har gam ye laghzish thi rah-e-ishq mein lekin

phisle to sambhaala hamein taslim-o-raza ne

ghera to bahut zulf-e-butan ne mujhe lekin

ab tak to is aafat se bachaya hai KHuda ne

dil pis ke 'amir' un ke qadam tak bhi na pahuncha

aur bose liye hathon ke bhi pis ke hina ne