ek poshida kamar yar ne kya rakkhi hai

ek poshīda kamar yaar ne kyā rakkhī hai

aañkh bhī shakl-e-dahan ham se churā rakkhī hai

khīñch shamshīr adā miyān meñ kyā rakkhī hai

ye bhī kyā ghaat hai qātil jo chhupā rakkhī hai

baiTh-baiTh ke masjid meñ na kar ai vā'iz

aisī shai hai ki qayāmat pa uThā rakkhī hai

ik zarā vahshat-e-dil baḌh ke ḳhabar to lenā

ḳhaak kyā najd meñ majnūñ ne uḌā rakhī hai

bazm-e-mai meñ jo ga.e ham to kahā saaqī ne

ik surāhī tirī ḳhātir bhī lagā rakhī hai

nigah-e-nāz se bhī dekh jo kartā hai halāl

ye adā kis ke liye tū ne uThā rakkhī hai

sāmne karke nigah mujh se ye qātil ne kahā

ki tire dam ko ye talvār lagā rakkhī hai

na dikhāte haiñ kamar ko na dahan ko ye but

achchhī jo chiiz hai vo aap uḌā rakkhī hai

hashr ke din na shikāyat meñ kamī kar ai dil

ab ye kis din ke liye tū ne uThā rakhī hai

namak-afshāñ jo huā zaḳhm pe hañs-hañs kar

maiñ ye samjhā koī qātil ne davā rakkhī hai

ġhair ke saath vafā karke vo ham se bole

ye vahī baat hai jo tum ne batā rakkhī hai

jā ke le aa.e use phir na maiñ jhagḌūñ na laḌūñ

muḳhtasar baat hai nāseh ne baḌhā rakkhī hai

naza.a meñ aao to phir us ko tasadduq kar diiñ

jaan ik seh-ramaqī ham ne bachā rakkhī hai

yaar muḳhtār hai jo chāhe kare ham se 'amīr'

gardan-e-'ijz tah-e-teġh-e-razā rakkhī hai

ek poshida kamar yar ne kya rakkhi hai

aankh bhi shakl-e-dahan hum se chura rakkhi hai

khinch shamshir ada miyan mein kya rakkhi hai

ye bhi kya ghat hai qatil jo chhupa rakkhi hai

baiTh-baiTh ke masjid mein na kar ai wa'iz

aisi shai hai ki qayamat pa uTha rakkhi hai

ek zara wahshat-e-dil baDh ke KHabar to lena

KHak kya najd mein majnun ne uDa rakhi hai

bazm-e-mai mein jo gae hum to kaha saqi ne

ek surahi teri KHatir bhi laga rakhi hai

nigah-e-naz se bhi dekh jo karta hai halal

ye ada kis ke liye tu ne uTha rakkhi hai

samne karke nigah mujh se ye qatil ne kaha

ki tere dam ko ye talwar laga rakkhi hai

na dikhate hain kamar ko na dahan ko ye but

achchhi jo chiz hai wo aap uDa rakkhi hai

hashr ke din na shikayat mein kami kar ai dil

ab ye kis din ke liye tu ne uTha rakhi hai

namak-afshan jo hua zaKHm pe hans-hans kar

main ye samjha koi qatil ne dawa rakkhi hai

ghair ke sath wafa karke wo hum se bole

ye wahi baat hai jo tum ne bata rakkhi hai

ja ke le aae use phir na main jhagDun na laDun

muKHtasar baat hai naseh ne baDha rakkhi hai

naza mein aao to phir us ko tasadduq kar din

jaan ek seh-ramaqi hum ne bacha rakkhi hai

yar muKHtar hai jo chahe kare hum se 'amir'

gardan-e-'ijz tah-e-tegh-e-raza rakkhi hai