kah rahi hai hashr mein wo aankh sharmai hui

kah rahī hai hashr meñ vo aañkh sharmā.ī huī

haa.e kaisī is bharī mahfil meñ rusvā.ī huī

Thokareñ khilvā.egī ye chaal iThlā.ī huī

kyā javānī phirtī hai joban pe itrā.ī huī

ā.īna meñ har adā ko dekh kar kahte haiñ vo

aaj dekhā chāhiye kis kis kī hai aa.ī huī

jāñbalab hasrat meñ paatī hai jo mujh nāshād ko

kyā hañsī phirtī hai un hoñToñ pe itrā.ī huī

khul gayā joban to 'ismat ne hayā se yuuñ kahā

ek añgḌā.ī meñ ham donoñ kī rusvā.ī huī

kaif-e-mastī meñ bhī rahtā hai ye joban kā lihāz

un ko añgḌā.ī bhī aatī hai to sharmā.ī huī

aañkh uThe par vo haTe ye bhī hai koī dekhnā

aaḌ meñ ghūñghaT ke aañkh aur vo bhī sharmā.ī huī

she'r gul-daste meñ mujh afsurda-dil ke kyā 'amīr'

dāman-e-gulchīñ meñ kuchh kaliyāñ haiñ murjhā.ī huī

kah rahi hai hashr mein wo aankh sharmai hui

hae kaisi is bhari mahfil mein ruswai hui

Thokaren khilwaegi ye chaal iThlai hui

kya jawani phirti hai joban pe itrai hui

aaina mein har ada ko dekh kar kahte hain wo

aaj dekha chahiye kis kis ki hai aai hui

jaanbalab hasrat mein pati hai jo mujh nashad ko

kya hansi phirti hai un honTon pe itrai hui

khul gaya joban to 'ismat ne haya se yun kaha

ek angDai mein hum donon ki ruswai hui

kaif-e-masti mein bhi rahta hai ye joban ka lihaz

un ko angDai bhi aati hai to sharmai hui

aankh uThe par wo haTe ye bhi hai koi dekhna

aaD mein ghunghaT ke aankh aur wo bhi sharmai hui

she'r gul-daste mein mujh afsurda-dil ke kya 'amir'

daman-e-gulchin mein kuchh kaliyan hain murjhai hui