fana kaisi baqa kaisi jab uske aashna Thahre

fanā kaisī baqā kaisī jab us ke āshnā Thahre

kabhī is ghar meñ aa Thahre kabhī us ghar meñ jā Thahre

mohammad mustafā ko hazrat-e-yūsuf se kyā nisbat

vo matlūb-e-zuleḳhā the ye mahbūb-e-ḳhudā Thahre

fanā fillāh jab ham ho ga.e to bas ham hī ham the

kabhī bande bane apne kabhī apne ḳhudā Thahre

haqīqat khol dī ā.īna-e-vahdat meñ donoñ kī

na tum ham se judā Thahre na ham tum se judā Thahre

vahāñ ik be-niyāzī aur yahāñ lākhoñ tamannā.eñ

vo lā-parvā sarāsar ham sarāpā mudda.ā Thahre

safeñ ārāsta hone lagīñ jab ahl-e-mahshar kī

jamā kar ek TukḌā hasratoñ kā ham judā Thahre

'amīr' aayā jo vaqt-e-imtihāñ to raah lī sab ne

hazāroñ saikḌoñ haiñ ranj-o-ġham do āshnā Thahre

fana kaisi baqa kaisi jab us ke aashna Thahre

kabhi is ghar mein aa Thahre kabhi us ghar mein ja Thahre

mohammad mustafa ko hazrat-e-yusuf se kya nisbat

wo matlub-e-zuleKHa the ye mahbub-e-KHuda Thahre

fana fillah jab hum ho gae to bas hum hi hum the

kabhi bande bane apne kabhi apne KHuda Thahre

haqiqat khol di aaina-e-wahdat mein donon ki

na tum hum se juda Thahre na hum tum se juda Thahre

wahan ek be-niyazi aur yahan lakhon tamannaen

wo la-parwa sarasar hum sarapa muddaa Thahre

safen aarasta hone lagin jab ahl-e-mahshar ki

jama kar ek TukDa hasraton ka hum juda Thahre

'amir' aaya jo waqt-e-imtihan to rah li sab ne

hazaron saikDon hain ranj-o-gham do aashna Thahre