tu jahan ban-Than ke nikla KHalq diwani hui

tū jahāñ ban-Than ke niklā ḳhalq dīvānī huī

jama-raibī se tire kis-kis kī 'uryānī huī

allāh-allāh kis qadar hai āshnā-e-husn-o-’ishq

baal udhar bikhre idhar dil ko pareshānī huī

mujh se tujh se ho chukī hai guftugū roz-e-azal

chhupne vaalī hai kahāñ āvāz pahchānī huī

hazrat-e-yūsuf ne achchhā gul khilāyā misr meñ

chāk-dāmānī se paidā pāk-dāmānī huī

jab huī vahshat tire kūcha hī meñ tan kar chale

ḳhaak bhī sar par vahī Daalī jo thī chhānī huī

mujh ko DevḌhī par biThā kar aap ghar meñ so rahe

'āshiqī kaahe ko Thahrī ye to darbānī huī

'āsiyoñ ko dekh kar āġhosh-e-rahmat meñ 'amīr'

be-gunāhoñ ko qiyāmat meñ pashemānī huī

tu jahan ban-Than ke nikla KHalq diwani hui

jama-raibi se tere kis-kis ki 'uryani hui

allah-allah kis qadar hai aashna-e-husn-o-’ishq

baal udhar bikhre idhar dil ko pareshani hui

mujh se tujh se ho chuki hai guftugu roz-e-azal

chhupne wali hai kahan aawaz pahchani hui

hazrat-e-yusuf ne achchha gul khilaya misr mein

chaak-damani se paida pak-damani hui

jab hui wahshat tere kucha hi mein tan kar chale

KHak bhi sar par wahi Dali jo thi chhani hui

mujh ko DewDhi par biTha kar aap ghar mein so rahe

'ashiqi kahe ko Thahri ye to darbani hui

'asiyon ko dekh kar aaghosh-e-rahmat mein 'amir'

be-gunahon ko qiyamat mein pashemani hui