na shikwa be-wafai ka na rona kaj-adai ka

na shikva be-vafā.ī kā na ronā kaj-adā.ī kā

sazā hai dil lagāne kī mazā hai āshnā.ī kā

taraqqī par kisī kī shoḳhiyāñ haiñ ḳhair ho yā-rab

hayā kī jaan kā dushman hai lapkā ḳhud-numā.ī kā

ye kis be-dard ne dast-e-nigārīñ ḳhvāb meñ chūmā

ki fariyādī hai ab tak nail us nāzuk kalā.ī kā

tumhīñ tum ā.īna-e-fānī meñ ho chāroñ taraf dekho

kaho jī ab bhī kuchh armāñ niklā ḳhud-numā.ī kā

’urūs-e-marg aa.ī mujh se ham-āġhosh hone ko

huā mashshātgī pesha mirī shām-e-judā.ī kā

'amīr' is kHirqa-o-’amāma ko tum rehn hī kar do

abhī phaptā nahīñ hai tum ko jaama pārsā.ī kā

na shikwa be-wafai ka na rona kaj-adai ka

saza hai dil lagane ki maza hai aashnai ka

taraqqi par kisi ki shoKHiyan hain KHair ho ya-rab

haya ki jaan ka dushman hai lapka KHud-numai ka

ye kis be-dard ne dast-e-nigarin KHwab mein chuma

ki fariyaadi hai ab tak nail us nazuk kalai ka

tumhin tum aaina-e-fani mein ho chaaron taraf dekho

kaho ji ab bhi kuchh arman nikla KHud-numai ka

’urus-e-marg aai mujh se ham-aghosh hone ko

hua mashshatgi pesha meri sham-e-judai ka

'amir' is kHirqa-o-’amama ko tum rehn hi kar do

abhi phapta nahin hai tum ko jama parsai ka