نہ شکوہ ہے وفائی کا نہ رونا کج ادائی کا

نہ شکوہ ہے وفائی کا نہ رونا کج ادائی کا

سزا ہے دل لگانے کی مزا ہے آشنائی کا

ترقی پر کسی کی شوخیاں ہیں خیر ہو یارب

حیا کی جان کا دشمن ہے لپکا خود نمائی کا

یہ کس بے درد نے دست نگاریں خواب میں چوما

کہ فریادی ہے اب تک نیل اس نازک کلائی کا

تمہیں تم آئینۂ فانی میں ہو چاروں طرف دیکھو

کہو جی اب بھی کچھ ارماں نکلا خود نمائی کا

عروس مرگ آئی مجھ سے ہم آغوش ہونے کو

ہوا مشاطگی پیشہ مری شام جدائی کا

امیرؔ اس خرقہ و عمامہ کو تم رہن ہی کر دو

ابھی پھپتا نہیں ہے تم کو جامہ پارسائی کا