mubaf khul gaya hai kisi gul-ezar ka

mūbāf khul gayā hai kisī gul-ezār kā

āñchal laTak rahā hai urūs-e-bahār kā

kuchh to sabab hai gardish-e-lail-o-nahār kā

us par paḌā hai sabr kisī be-qarār kā

kyā dil jalā rahā hai pas-e-marg hai duā

ThanDā rahe charāġh ilāhī mazār kā

jin ko milā ke ḳhaak meñ ḳhush ho rahe ho tum

takiyoñ meñ dekho raqs bhī un ke ġhubār kā

gard-e-nazar se ho na mukaddar ulaT naqāb

ġhāfil ġhubār hai ye rah-e-intizār kā

phūloñ kā qāfila hai ki utrī hai ye barāt

har shāḳh-e-gul hai paañv urūs-e-bahār kā

aa.eñ vo yā na aa.eñ taras khā.eñ yā na khā.eñ

kyā iḳhtiyār girya-e-be-iḳhtiyār kā

phir baiThe baiThe va.ada-e-vasl us ne kar liyā

phir uTh khaḌā huā vahī rog intizār kā

dil-soz bekasī sā nahīñ koī ba.ad-e-marg

parvāna ho ga.ī mere sham'-e-mazār kā

ro.uuñ to un ko aatī hai be-sāḳhta hañsī

achchhā hai joḌ girya-e-be-iḳhtiyār kā

aisā mazā milā hai taḌap meñ ki hai duā

baḌh jaa.e aur tuul shab-e-intizār kā

par lag ga.e chaman ke tum aa.e jo sair ko

kyā uḌ chalā hai rañg urūs-e-bahār kā

vo shoḳh apnī raah hai ye apnī raah hai

qaabū kā dil-rubā hai na dil iḳhtiyār kā

saaqī ke haath se jo girā jaam kah uThā

TuuTā vo dil kahīñ kisī umīd-vār kā

ham-rāh hai jo hasrat-o-armāñ kī bhīḌ-bhāḌ

tābūt uThā 'amīr'-e-ġharīb-ud-dayār kā

mubaf khul gaya hai kisi gul-ezar ka

aanchal laTak raha hai urus-e-bahaar ka

kuchh to sabab hai gardish-e-lail-o-nahaar ka

us par paDa hai sabr kisi be-qarar ka

kya dil jala raha hai pas-e-marg hai dua

ThanDa rahe charagh ilahi mazar ka

jin ko mila ke KHak mein KHush ho rahe ho tum

takiyon mein dekho raqs bhi un ke ghubar ka

gard-e-nazar se ho na mukaddar ulaT naqab

ghafil ghubar hai ye rah-e-intizar ka

phulon ka qafila hai ki utri hai ye baraat

har shaKH-e-gul hai panw urus-e-bahaar ka

aaen wo ya na aaen taras khaen ya na khaen

kya iKHtiyar girya-e-be-iKHtiyar ka

phir baiThe baiThe wada-e-wasl us ne kar liya

phir uTh khaDa hua wahi rog intizar ka

dil-soz bekasi sa nahin koi baad-e-marg

parwana ho gai mere sham'-e-mazar ka

roun to un ko aati hai be-saKHta hansi

achchha hai joD girya-e-be-iKHtiyar ka

aisa maza mila hai taDap mein ki hai dua

baDh jae aur tul shab-e-intizar ka

par lag gae chaman ke tum aae jo sair ko

kya uD chala hai rang urus-e-bahaar ka

wo shoKH apni rah hai ye apni rah hai

qabu ka dil-ruba hai na dil iKHtiyar ka

saqi ke hath se jo gira jam kah uTha

TuTa wo dil kahin kisi umid-war ka

ham-rah hai jo hasrat-o-arman ki bhiD-bhaD

tabut uTha 'amir'-e-gharib-ud-dayar ka