wasl hasil hai magar hai gham-e-hijran ab tak

vasl hāsil hai magar hai ġham-e-hijrāñ ab tak

jam.a sāmān hai par dil hai pareshāñ ab tak

thak chuke par hai sar-e-sair-e-bayābāñ ab tak

vahī kāñTe haiñ vahī gosha-e-dāmāñ ab tak

teġh us turk ne go khol ke rakh dī hai magar

ro.ab bāñdhe hue hai shahr meñ maidāñ ab tak

qaid se dasht meñ aa.e hue muddat guzrī

shauq meñ mere khulā hai dar-e-zindāñ ab tak

piirī aa.ī hue sab mue siyah sar pe saped

sub.h hotī nahīñ lekin shab-e-hijrāñ ab tak

dil jigar sīna-o-sar sab hue chhalnī lekin

tiir par lagātī hai vo mizhgāñ ab tak

kitne bad-baḳht the jo chhoḌ ga.e rasm-e-sitam

mar chuke phir bhī likhe jaate haiñ 'isyāñ ab tak

'umr guzrī hai ki huuñ muntazir-e-roz-e-visāl

nahīñ aatā hai vo ai gardish-e-daurāñ ab tak

kyā rafū-gar kī nadāmat kī hai us ko bhī ḳhabar

hañs rahā hai jo mirā chāk-e-garebān ab tak

'umr guzrī hai ilāhī ajal aatī hai na yaar

koī mushkil mirī hotī nahīñ āsāñ ab tak

sho.arā uTh ga.e duniyā se magar dekh 'amīr'

achchhe sheroñ kā zamāna hai sanā-ḳhvāñ ab tak

wasl hasil hai magar hai gham-e-hijran ab tak

jama saman hai par dil hai pareshan ab tak

thak chuke par hai sar-e-sair-e-bayaban ab tak

wahi kanTe hain wahi gosha-e-daman ab tak

tegh us turk ne go khol ke rakh di hai magar

roab bandhe hue hai shahr mein maidan ab tak

qaid se dasht mein aae hue muddat guzri

shauq mein mere khula hai dar-e-zindan ab tak

piri aai hue sab mue siyah sar pe saped

subh hoti nahin lekin shab-e-hijran ab tak

dil jigar sina-o-sar sab hue chhalni lekin

tir par lagati hai wo mizhgan ab tak

kitne bad-baKHt the jo chhoD gae rasm-e-sitam

mar chuke phir bhi likhe jate hain 'isyan ab tak

'umr guzri hai ki hun muntazir-e-roz-e-visal

nahin aata hai wo ai gardish-e-dauran ab tak

kya rafu-gar ki nadamat ki hai us ko bhi KHabar

hans raha hai jo mera chaak-e-gareban ab tak

'umr guzri hai ilahi ajal aati hai na yar

koi mushkil meri hoti nahin aasan ab tak

shoara uTh gae duniya se magar dekh 'amir'

achchhe sheron ka zamana hai sana-KHwan ab tak