sun katha meri achchhi saheli

sun kathā merī achchhī sahelī

raat meñ so rahī thī akelī

aa.ī ḳhushbū mujhe 'itr kī sī

chhū ga.ī saañs mujh ko kisī kī

chhā ga.ī un kī badlī karam kī

band āñkhoñ meñ bijlī sī chamkī

ho gayā fazl baarī tā'lā

aayā ghar meñ mere kamlī vaalā

mahv-e-dīd-e-ruḳh yaar huuñ maiñ

ḳhvāb meñ huuñ ki bedār huuñ maiñ

ab chale aag meñ merī sautan

maiñ to rākhūñgī dāman se dāman

ab kahīñ us ko jaane na dūñgī

ġhair ko muñh dikhāne na dūñgī

ġham-kade meñ mere 'iid hogī

ab to āThoñ pahar giit hogī

maiñ usī bazm meñ jhūmtī thī

apnī qismat kā muñh chūmtī thī

yak ba-yak jab zarā aañkh chamkī

kaḌ kaḌā kar girī ġham kī bijlī

haa.e taqdīr ne rañg badlā

phir ye dekhā ki us ko na dekhā

us ne jalva dikhāyā hī kyuuñ thā

jaane vaalā phir aayā hī kyuuñ thā

us ne amjad kā jī kyuuñ jalāyā

chhupne vaale ne muñh kyuuñ dikhāyā

ab na ham haiñ na vo ham-nashīñ haiñ

haa.e sab ho ke phir kuchh nahīñ hai

sun katha meri achchhi saheli

raat mein so rahi thi akeli

aai KHushbu mujhe 'itr ki si

chhu gai sans mujh ko kisi ki

chha gai un ki badli karam ki

band aankhon mein bijli si chamki

ho gaya fazl bari ta'la

aaya ghar mein mere kamli wala

mahw-e-did-e-ruKH yar hun main

KHwab mein hun ki bedar hun main

ab chale aag mein meri sautan

main to rakhungi daman se daman

ab kahin us ko jaane na dungi

ghair ko munh dikhane na dungi

gham-kade mein mere 'id hogi

ab to aaThon pahar git hogi

main usi bazm mein jhumti thi

apni qismat ka munh chumti thi

yak ba-yak jab zara aankh chamki

kaD kaDa kar giri gham ki bijli

hae taqdir ne rang badla

phir ye dekha ki us ko na dekha

us ne jalwa dikhaya hi kyun tha

jaane wala phir aaya hi kyun tha

us ne amjad ka ji kyun jalaya

chhupne wale ne munh kyun dikhaya

ab na hum hain na wo ham-nashin hain

hae sab ho ke phir kuchh nahin hai