anal-haq ka kabhi banda se dawa ho nahin sakta

anal-haq kā kabhī banda se dā'vā ho nahīñ saktā

judā jab tak rahe qatra vo dariyā ho nahīñ saktā

do 'ālam banda-e-be-dām ho jaa.eñ magar ai dil

sanam kā raaz har ek par huvaidā ho nahīñ saktā

havā-e-'ishq chhū bhī jaaye jis ke ġhuncha-e-dil ko

ġhalat hai kaun kahtā hai vo rusvā ho nahīñ saktā

khulā vaisā hī jaisā soz-e-ġham dil meñ chhupāyā thā

'ajab ye raaz pinhāñ hai ki iḳhfā ho nahīñ saktā

ho daḳhl lāt-o-'uzzā kis tarah se ḳhāna-e-dil meñ

harīm-e-ḳhāliq-e-akbar kalīsā ho nahīñ saktā

to ho sargarm mast-e-nāz aur ye jaañ na de baiThe

mirī jaañ 'farhat'-e-shaidā se aisā ho nahīñ saktā

anal-haq ka kabhi banda se da'wa ho nahin sakta

juda jab tak rahe qatra wo dariya ho nahin sakta

do 'alam banda-e-be-dam ho jaen magar ai dil

sanam ka raaz har ek par huwaida ho nahin sakta

hawa-e-'ishq chhu bhi jaye jis ke ghuncha-e-dil ko

ghalat hai kaun kahta hai wo ruswa ho nahin sakta

khula waisa hi jaisa soz-e-gham dil mein chhupaya tha

'ajab ye raaz pinhan hai ki iKHfa ho nahin sakta

ho daKHl lat-o-'uzza kis tarah se KHana-e-dil mein

harim-e-KHaliq-e-akbar kalisa ho nahin sakta

to ho sargarm mast-e-naz aur ye jaan na de baiThe

meri jaan 'farhat'-e-shaida se aisa ho nahin sakta