koi apne hathon se shisha gira de koi jhum kar jam-o-KHum toD Dale

koī apne hāthoñ se shīsha girā de koī jhuum kar jām-o-ḳhum toḌ Daale

agar tum mohabbat se aakar pilāo to dīvāna apnī qasam toḌ Daale

mohabbat meñ ik iltijā kī thī maiñ ne baḌe pyaar se ye ḳhatā kī maiñ ne

ḳhudā kī qasam sirf itnī ḳhatā par sitamgar ne lākhoñ sitam toḌ Daale

jo tū but-kade kī taraf ho ke guzre to zāhid vahāñ apnā ka.aba banā le

pujārī agar tujh ko ik baar dekhe to chun-chun ke ek-ek sanam toḌ Daale

maiñ jab us ko samjhūñ maiñ jab is ko jānūñ maiñ jab us ko apnāo jab is ko mānūñ

jo kāfir samajhtā hai mujh ko ye kāfir mirā kufr hī kam se kam toḌ Daale

'ajab us kī mahfil kā 'ālam thā 'anvar' kuchh is tarah dīvāngī chhā.ī sab par

idhar us ne añgḌā.ī ko haath uThā.e udhar shā.iroñ ne qalam toḌ Daale

koi apne hathon se shisha gira de koi jhum kar jam-o-KHum toD Dale

agar tum mohabbat se aakar pilao to diwana apni qasam toD Dale

mohabbat mein ek iltija ki thi main ne baDe pyar se ye KHata ki main ne

KHuda ki qasam sirf itni KHata par sitamgar ne lakhon sitam toD Dale

jo tu but-kade ki taraf ho ke guzre to zahid wahan apna kaba bana le

pujari agar tujh ko ek bar dekhe to chun-chun ke ek-ek sanam toD Dale

main jab us ko samjhun main jab is ko jaanun main jab us ko apnao jab is ko manun

jo kafir samajhta hai mujh ko ye kafir mera kufr hi kam se kam toD Dale

'ajab us ki mahfil ka 'alam tha 'anwar' kuchh is tarah diwangi chhai sab par

idhar us ne angDai ko hath uThae udhar shairon ne qalam toD Dale