کوئی اپنے ہاتھوں سے شیشہ گرا دے کوئی جھوم کر جام و خم توڑ ڈالے

کوئی اپنے ہاتھوں سے شیشہ گرا دے کوئی جھوم کر جام و خم توڑ ڈالے

اگر تم محبت سے آکر پلاؤ تو دیوانہ اپنی قسم توڑ ڈالے

محبت میں اک التجا کی تھی میں نے بڑے پیار سے یہ خطا کی میں نے

خدا کی قسم صرف اتنی خطا پر ستم گر نے لاکھوں ستم توڑ ڈالے

جو تو بت کدے کی طرف ہو کے گزرے تو زاہد وہاں اپنا کعبہ بنا لے

پجاری اگر تجھ کو اک بار دیکھے تو چن چن کے ایک ایک صنم توڑ ڈالے

میں جب اس کو سمجھوں میں جب اس کو جانوں میں جب اس کو اپناؤ جب اس کو مانوں

جو کافر سمجھتا ہے مجھ کو یہ کافر مرا کفر ہی کم سے کم توڑ ڈالے

عجب اس کی محفل کا عالم تھا انورؔ کچھ اس طرح دیوانگی چھائی سب پر

ادھر اس نے انگڑائی کو ہاتھ اٹھائے ادھر شاعروں نے قلم توڑ ڈالے