yahi waqt hai mai-kada ja ke zahid sharab-e-mohabbat se dil apna dho le

yahī vaqt hai mai-kada jā ke zāhid sharāb-e-mohabbat se dil apnā dho le

vo dekh āsmāñ se ghaTāoñ kī pariyāñ chalī aa rahī haiñ idhar baal khole

ye maanā shab-e-hijr mushkil hai jiinā magar ġham ko aa jā.egā ḳhud pasīna

abhī Thahar jaao sahr kī hasīna zarā apne bāloñ meñ motī piro le

ḳhudā kī qasam ḳhud hī so jaa.eñ nīndeñ tāroñ kī duniyā meñ kho jaa.eñ nīndeñ

nisār us kī āñkhoñ pe ho jaa.eñ nīndeñ jo ik raat āġhosh meñ tere so le

mire dil kī duniyā se un kī nazar tak taḌapte haiñ sajde to kyā sajda dar tak

pahuñchnā hoñ jis ko bhī ab un ke dar tak vo dīvāna ban kar mire saath ho le

sunī jab ġhazal mujh se mahfil ke andar to sharmā ke bole mukarrar mukarrar

sadāqat kā jaadū vo jaadū hai 'anvar' jo saare zamāne meñ sar chaḌh ke bole

yahi waqt hai mai-kada ja ke zahid sharab-e-mohabbat se dil apna dho le

wo dekh aasman se ghaTaon ki pariyan chali aa rahi hain idhar baal khole

ye mana shab-e-hijr mushkil hai jina magar gham ko aa jaega KHud pasina

abhi Thahar jao sahr ki hasina zara apne baalon mein moti piro le

KHuda ki qasam KHud hi so jaen ninden taron ki duniya mein kho jaen ninden

nisar us ki aankhon pe ho jaen ninden jo ek raat aaghosh mein tere so le

mere dil ki duniya se un ki nazar tak taDapte hain sajde to kya sajda dar tak

pahunchna hon jis ko bhi ab un ke dar tak wo diwana ban kar mere sath ho le

suni jab ghazal mujh se mahfil ke andar to sharma ke bole mukarrar mukarrar

sadaqat ka jadu wo jadu hai 'anwar' jo sare zamane mein sar chaDh ke bole