یہی وقت ہے مے کدہ جا کے زاہد شراب محبت سے دل اپنا دھو لے

یہی وقت ہے مے کدہ جا کے زاہد شراب محبت سے دل اپنا دھو لے

وہ دیکھ آسماں سے گھٹاؤں کی پریاں چلی آ رہی ہیں ادھر بال کھولے

یہ مانا شب ہجر مشکل ہے جینا مگر غم کو آ جائے گا خود پسینہ

ابھی ٹھہر جاؤ سحر کی حسینہ ذرا اپنے بالوں میں موتی پرو لے

خدا کی قسم خود ہی سو جائیں نیندیں تاروں کی دنیا میں کھو جائیں نیندیں

نثار اس کی آنکھوں پہ ہو جائیں نیندیں جو اک رات آغوش میں تیرے سو لے

مرے دل کی دنیا سے ان کی نظر تک تڑپتے ہیں سجدے تو کیا سجدہ در تک

پہنچنا ہوں جس کو بھی اب ان کے در تک وہ دیوانہ بن کر مرے ساتھ ہو لے

سنی جب غزل مجھ سے محفل کے اندر تو شرما کے بولے مکرر مکرر

صداقت کا جادو وہ جادو ہے انورؔ جو سارے زمانے میں سر چڑھ کے بولے