aql ka hukm hai udhar tu na jaana ai dil

'aql kā hukm hai udhar tū na jaanā ai dil

'ishq kahtā hai ki phir vaañ se na aanā ai dil

'aql ḳhārij huī jis vaqt huā 'ishq kā daḳhl

aañkh lagte hī hue hosh ravāna ai dil

girya mat kar nahīñ hone kā ġham-e-yār firo

hai kaThin paanī se ye aag bujhānā ai dil

maiñ na kahtā thā ki ik roz tū rusvā hogā

is qadar us pe huā kyuuñ tū divānā ai dil

tā'n-o-tashnī' raqīboñ se salāmat hai muhāl

'ishq-bāzī hai malāmat kā nishāna ai dil

baaz aa maan kahā us kī taraf phir mat jā

kyā nahīñ aur kahīñ terā Thikānā ai dil

kyuuñ tū majnūñ-sā huā 'ishq meñ añgusht-numā

naam rakhtā hai tirā ek zamānā ai dil

dilbarī kuchh bhī ho jis meñ hai dil-āzār vahī

bar meñ apne kabhī us ko na biThānā ai dil

jis ko maiñ jān-e-'azīz apnā samajhtā thā 'turāb'

'ishq meñ vo bhī huā mujh se begānā ai dil

'aql ka hukm hai udhar tu na jaana ai dil

'ishq kahta hai ki phir wan se na aana ai dil

'aql KHarij hui jis waqt hua 'ishq ka daKHl

aankh lagte hi hue hosh rawana ai dil

girya mat kar nahin hone ka gham-e-yar firo

hai kaThin pani se ye aag bujhana ai dil

main na kahta tha ki ek roz tu ruswa hoga

is qadar us pe hua kyun tu diwana ai dil

ta'n-o-tashni' raqibon se salamat hai muhaal

'ishq-bazi hai malamat ka nishana ai dil

baz aa man kaha us ki taraf phir mat ja

kya nahin aur kahin tera Thikana ai dil

kyun tu majnun-sa hua 'ishq mein angusht-numa

nam rakhta hai tera ek zamana ai dil

dilbari kuchh bhi ho jis mein hai dil-azar wahi

bar mein apne kabhi us ko na biThana ai dil

jis ko main jaan-e-'aziz apna samajhta tha 'turab'

'ishq mein wo bhi hua mujh se begana ai dil