ادنیٰ سا یہ حیرت کا تماشا نظر آیا

ادنیٰ سا یہ حیرت کا تماشا نظر آیا

جو تھا پس پردہ سر پردہ نظر آیا

پھر میں نظر آیا نہ تماشہ نظر آیا

جب تو نظر آیا مجھے تنہا نظر آیا

اللہ رے دیوانگئ شوق کا عالم

اک رقص میں ہر ذرہ صحرا نظر آیا

اٹھے عجب انداز سے وہ جوش غضب سے

چڑھتا ہوا اک حسن کا دریا نظر آیا

کس درجہ ترا حسن بھی آشوب جہاں ہے

جس ذرے کو دیکھا وہ تڑپتا نظر آیا

اب خود ترا جلوہ جو دکھا دے وہ دکھا دے

یہ دیدۂ بینا تو تماشہ نظر آیا

تھا لطف جنوں دیدۂ خوں نابہ فشاں سے

پھولوں سے بھرا دامن صحرا نظر آیا