khol kar aankhen jo dekha to jahan kuchh bhi nahin

khol kar āñkheñ jo dekhā to jahāñ kuchh bhī nahīñ

mā-sivā-e-ranj-o-hasrat ke yahāñ kuchh bhī nahīñ

ham azal se sun ke aa.e the bahut tārīf par

haaye jab duniyā ko dekhā to yahāñ kuchh bhī nahīñ

dīda-e-dil khol kar gor-e-ġharībāñ dekh lo

ġhāfilo hu kā samāñ hai aur vahāñ kuchh bhī nahīñ

kal to uḌte the pharere aaj un kī qabr par

nā-murādī kā hai jhanDā aur nishāñ kuchh bhī nahīñ

jin hasīnoñ meñ bhare the kuuT kar nāz-o-adā

sab ke sab ḳhāmosh haiñ ab shoḳhiyāñ kuchh bhī nahīñ

vaqt-e-rehlat pūchhā daarā se kaho kyā le chale

dast-e-hasrat mil ke bolā mehrbāñ kuchh bhī nahīñ

rañj hogā dekh loge turbat-e-‘asġhar’ agar

kHāk-o-miTTī ke sivā ab to vahāñ kuchh bhī nahīñ

khol kar aankhen jo dekha to jahan kuchh bhi nahin

ma-siwa-e-ranj-o-hasrat ke yahan kuchh bhi nahin

hum azal se sun ke aae the bahut tarif par

haye jab duniya ko dekha to yahan kuchh bhi nahin

dida-e-dil khol kar gor-e-ghariban dekh lo

ghafilo hu ka saman hai aur wahan kuchh bhi nahin

kal to uDte the pharere aaj un ki qabr par

na-muradi ka hai jhanDa aur nishan kuchh bhi nahin

jin hasinon mein bhare the kuT kar naz-o-ada

sab ke sab KHamosh hain ab shoKHiyan kuchh bhi nahin

waqt-e-rehlat puchha dara se kaho kya le chale

dast-e-hasrat mil ke bola mehrban kuchh bhi nahin

ranj hoga dekh loge turbat-e-‘asghar’ agar

kHak-o-miTTi ke siwa ab to wahan kuchh bhi nahin