pi ke nikla hai jo saqi tere mai-KHane se

pī ke niklā hai jo saaqī tere mai-ḳhāne se

rāz-e-dil vo na kahegā kisī be-gāne se

munkashif hogā na kā'be se na but-ḳhāne se

pūchhiye rāz-e-anal-haq kisī dīvāne se

māya-e-nāz hai ai ahl-e-ḳhirad siikh to lo

ātish-e-'ishq meñ jalnā kisī parvāne se

muñh na pherūñgā kabhī jānib-e-firdaus-e-barīñ

mar ke bhī murshid-e-kāmil tere kāshāne se

sāl-hā-sāl se dīvāna yahāñ baiThā hai

lau lagā.e hue saaqī tere mai-ḳhāne se

mohtasib ne jo nikālā mujhe mai-ḳhāne se

duur tak aañkh milāte ga.e paimāne se

mujh ko to ġhair se takrār kā sadma yuuñ hai

thoḌā-thoḌā vo hue baat ke baḌh jaane se

aap itnā to zarā hazrat-e-nāseh samjheñ

jo na samjhe use kyā fā.eda samjhāne se

aaj to ḳhum hī mire muñh se lagā de saaqī

merī nīyat nahīñ bhartī tere paimāne se

tum zarā hazrat-e-nāseh ko dikhā do jalva

baaz aatā nahīñ zālim mere samjhāne se

maiñ ne chakhī thī ki saaqī ne kahā joḌ ke haath

aap lalā chale jā.iye mai-ḳhāne se

na uThe jor kisī se to vo ro kar bole

be-mazā ho ga.e ham 'ashk' ke mar jaane se

pi ke nikla hai jo saqi tere mai-KHane se

raaz-e-dil wo na kahega kisi be-gane se

munkashif hoga na ka'be se na but-KHane se

pūchhiye raaz-e-anal-haq kisi diwane se

maya-e-naz hai ai ahl-e-KHirad sikh to lo

aatish-e-'ishq mein jalna kisi parwane se

munh na pherunga kabhi jaanib-e-firdaus-e-barin

mar ke bhi murshid-e-kaamil tere kashane se

sal-ha-sal se diwana yahan baiTha hai

lau lagae hue saqi tere mai-KHane se

mohtasib ne jo nikala mujhe mai-KHane se

dur tak aankh milate gae paimane se

mujh ko to ghair se takrar ka sadma yun hai

thoDa-thoDa wo hue baat ke baDh jaane se

aap itna to zara hazrat-e-naseh samjhen

jo na samjhe use kya faeda samjhane se

aaj to KHum hi mere munh se laga de saqi

meri niyat nahin bharti tere paimane se

tum zara hazrat-e-naseh ko dikha do jalwa

baz aata nahin zalim mere samjhane se

main ne chakhi thi ki saqi ne kaha joD ke hath

aap lala chale jaiye mai-KHane se

na uThe jor kisi se to wo ro kar bole

be-maza ho gae hum 'ashk' ke mar jaane se