asir-e-halqa-e-gesu-e-yar hum bhi hain

asīr-e-halqa-e-gesū-e-yār ham bhī haiñ

kisī ke tīr-e-nazar ke shikār ham bhī haiñ

hameñ to shahr meñ rindoñ ke saath rahnā hai

ġhulām-e-sāqī-e-'ālī-vaqār ham bhī haiñ

vahī nahīñ haiñ faqat dil ke lene par majbūr

ki dil ke dene meñ be-iḳhtiyār ham bhī haiñ

vo bāġh-e-ḳhuld ke shohra hai jiskā 'ālam meñ

usī chaman kī guzashta bahār ham bhī haiñ

hazār ahl-e-ḳhirad ke liye haiñ dil tum ne

hamārā dil bhī to lo hoshiyār ham bhī haiñ

sabā sambhal ke qadam kū-e-yār meñ rakhnā

ki us galī meñ ba-shakl-e-ġhubār ham bhī haiñ

balā se ham se bhī 'nayyar' ḳhilāf ho koī

asīr-e-ulfat-e-ahl-e-mazār ham bhī haiñ

asir-e-halqa-e-gesu-e-yar hum bhi hain

kisi ke tir-e-nazar ke shikar hum bhi hain

hamein to shahr mein rindon ke sath rahna hai

ghulam-e-saqi-e-'ali-waqar hum bhi hain

wahi nahin hain faqat dil ke lene par majbur

ki dil ke dene mein be-iKHtiyar hum bhi hain

wo bagh-e-KHuld ke shohra hai jiska 'alam mein

usi chaman ki guzashta bahaar hum bhi hain

hazar ahl-e-KHirad ke liye hain dil tum ne

hamara dil bhi to lo hoshiyar hum bhi hain

saba sambhal ke qadam ku-e-yar mein rakhna

ki us gali mein ba-shakl-e-ghubar hum bhi hain

bala se hum se bhi 'nayyar' KHilaf ho koi

asir-e-ulfat-e-ahl-e-mazar hum bhi hain