azal mein jo sada maine suni thi kaif-e-masti mein

azal meñ jo sadā maiñ ne sunī thī kaif-e-mastī meñ

vahī āvāz ab tak sun rahā huuñ sāz-e-hastī meñ

nazar aatī hai mujh ko apnī hastī yaar kī hastī

fanā jab se huī hai merī hastī us kī hastī meñ

tere hone hī se to merī hastī ho ga.ī hastī

yaqīnan maiñ nahīñ huuñ tū hī tū hī merī hastī meñ

fanā jab merī hastī ho ga.ī ain-e-haqīqat meñ

to us yaktā ke jalve mil ga.e ḳhud merī hastī meñ

butoñ meñ dekhtā huuñ 'aks-e-husn shāhid-e-'ālam

ḳhudā ko pā liyā vallāh maiñ ne but-parastī meñ

mirā īmān ġhārat kar diyā jis but kī nazroñ ne

usī kāfir kā jalva dekhtā huuñ haq-parastī meñ

maiñ us tauhīd ke maidān meñ gum-karda kasrat huuñ

jahāñ kuchh farq hī baaqī nahīñ hai auj-o-pastī meñ

gadā-e-vālī-e-ajmer mujh ko log kahte haiñ

basāyā hai mujhe ḳhvāja ne jab se apnī bastī meñ

na kyuuñ raqsāñ hoñ 'ḳhādim' zarra-zarra merī hastī kā

shabīh-e-husn-e-sāqī dekhtā huuñ kaif-e-mastī meñ

azal mein jo sada main ne suni thi kaif-e-masti mein

wahi aawaz ab tak sun raha hun saz-e-hasti mein

nazar aati hai mujh ko apni hasti yar ki hasti

fana jab se hui hai meri hasti us ki hasti mein

tere hone hi se to meri hasti ho gai hasti

yaqinan main nahin hun tu hi tu hi meri hasti mein

fana jab meri hasti ho gai ain-e-haqiqat mein

to us yakta ke jalwe mil gae KHud meri hasti mein

buton mein dekhta hun 'aks-e-husn shahid-e-'alam

KHuda ko pa liya wallah main ne but-parasti mein

mera iman ghaarat kar diya jis but ki nazron ne

usi kafir ka jalwa dekhta hun haq-parasti mein

main us tauhid ke maidan mein gum-karda kasrat hun

jahan kuchh farq hi baqi nahin hai auj-o-pasti mein

gada-e-wali-e-ajmer mujh ko log kahte hain

basaya hai mujhe KHwaja ne jab se apni basti mein

na kyun raqsan hon 'KHadim' zarra-zarra meri hasti ka

shabih-e-husn-e-saqi dekhta hun kaif-e-masti mein