zinda rahta hai zinde mein

zinda rahtā hai zinde meñ

allāh band huā bande meñ

lākhoñ parde ik parde meñ

allāh band huā bande meñ

saarā 'ālam hai nūrānī

jis kī sūrat hai yazdānī

us se haT kar sab nādānī

kalima ā.īna-e-rūhānī

ġhāfil sab kuchh hai kalime meñ

allāh band huā bande meñ

karnā hai to murshid karle

apnī sāñsoñ meñ dam bhar le

ġhaflat mat kar jaldī kar le

murshid batlā.e so kar le

saarā raaz chhupā bande meñ

allāh band huā bande meñ

saarā 'ālam hai tahrīrī

hai nukte kī herā-pherī

ġhaflat kyuuñ hai tujh ko gherī

duniyā terī hai na merī

maqsad hai be ke nukta meñ

allāh band huā bande meñ

mandir masjid ab kyā jaanā

aanā jaanā jaanā aanā

ye to khel huā bachkāna

mat dīvāna ban ai daanā

kyā DhūñDegā tū murde meñ

allāh band huā bande meñ

apnī zaat ko sajda kar le

aage chal kar parda kar le

hai tū qatra dariyā kar le

har tahrīr ko nukta kar le

'rizvāñ' diid huī sajde meñ

allāh band huā bande meñ

zinda rahta hai zinde mein

allah band hua bande mein

lakhon parde ek parde mein

allah band hua bande mein

sara 'alam hai nurani

jis ki surat hai yazdani

us se haT kar sab nadani

kalima aaina-e-ruhani

ghafil sab kuchh hai kalime mein

allah band hua bande mein

karna hai to murshid karle

apni sanson mein dam bhar le

ghaflat mat kar jaldi kar le

murshid batlae so kar le

sara raaz chhupa bande mein

allah band hua bande mein

sara 'alam hai tahriri

hai nukte ki hera-pheri

ghaflat kyun hai tujh ko gheri

duniya teri hai na meri

maqsad hai be ke nukta mein

allah band hua bande mein

mandir masjid ab kya jaana

aana jaana jaana aana

ye to khel hua bachkana

mat diwana ban ai dana

kya DhunDega tu murde mein

allah band hua bande mein

apni zat ko sajda kar le

aage chal kar parda kar le

hai tu qatra dariya kar le

har tahrir ko nukta kar le

'rizwan' did hui sajde mein

allah band hua bande mein