ibtida mein hazrat-e-insan kya tha kya hua

ibtidā meñ hazrat-e-insān kyā thā kyā huā

ġhaur kar ḳhud ko zarā pahchān kyā thā kyā huā

ye samajh kar sajda kar letā huuñ pā-e-yār par

sajda na karne se ye shaitāñ kyā thā kyā huā

pahle thā īmān ġhairoñ par ab apne aap par

kyā kahūñ pahle mirā īmān kyā thā kyā huā

haal mustaqbil-o-māzī kā hai naqsha dhyān meñ

isliye kahtā huuñ ḳhud ko jaan kyā thā kyā huā

kuchh na the to kuchh hue phir kuchh to hoñge ā.inda

ġhaur karne par khulā 'irfān kyā thā kyā huā

ganj-e-maḳhfī meñ merī hastī kyā 'unvān thā

sochtā huuñ aaj vo 'irfān kyā thā kyā huā

jo bhī hai jaisā bhī hai gar jāntā hai jaan lo

maiñ nahīñ kahtā ki ye 'rizvāñ' kyā thā kyā huā

ibtida mein hazrat-e-insan kya tha kya hua

ghaur kar KHud ko zara pahchan kya tha kya hua

ye samajh kar sajda kar leta hun pa-e-yar par

sajda na karne se ye shaitan kya tha kya hua

pahle tha iman ghairon par ab apne aap par

kya kahun pahle mera iman kya tha kya hua

haal mustaqbil-o-mazi ka hai naqsha dhyan mein

isliye kahta hun KHud ko jaan kya tha kya hua

kuchh na the to kuchh hue phir kuchh to honge aainda

ghaur karne par khula 'irfan kya tha kya hua

ganj-e-maKHfi mein meri hasti kya 'unwan tha

sochta hun aaj wo 'irfan kya tha kya hua

jo bhi hai jaisa bhi hai gar jaanta hai jaan lo

main nahin kahta ki ye 'rizwan' kya tha kya hua